Җәнубий моңғулийәдә моңғулларниң наразилиқ намайиши улғаймақта

Америкида паалийәт елип бериватқан җәнубий моңғулийә кишилик һоқуқ җәмийитиниң торида хәвәр қилинишичә, җәнубий моңғулийәдә давам қиливатқан моңғулларниң хитай һакимийитигә қарши наразилиқ һәрикәтлири барғансери улғаймақта.

Хәвәрдә дейилишичә, 30-январ күни 200 гә йеқин моңғул чарвичи дурбәд баннәр наһийисидә топлинип наразилиқ намайиши өткүзгән. Қоллирида лозунка көтүргән намайишчилар, тартивелинған яйлақлирини қайтуруп беришни вә чирик әмәлдарларниң җазалинишини тәләп қилған. Хитай тәрәп намайиш мәйданиға қораллиқ қисим әвәтип намайишчиларни мәҗбурий тарқақлаштурған вә шу күнки намайишниң йетәкчи вә актип иштиракчилиридин җәмий 21 киши тутқун қилинип, булардин 15 и қолға елинған. Мәзкур җәмийәтниң баян қилишичә, бу әһвал, моңғулларниң наразилиқини һәссиләп күчләндүргән.

Мәзкур намайиштин илгири йәнә бир қисим моңғуллар бейҗиң вә көкхотта коллектип әрз сунуш шәклидә наразилиқ паалийити елип барған, бу һечқандақ үнүм бәрмигәндин кейин, моңғулларниң наразилиқ һәрикити дурбәд баннәр қатарлиқ җайларда намайиш шәклидә давам қилмақта.