Xitay kompartiyisining mongghul aliy derijilik rehbiri kadiri wezipisidin qalduruldi

Muxbirimiz ümidwar
2018-02-26
Share

Yekshenbe küni xitay asasiy qanunidin dölet re'isi we mu'awin re'isining wezipe ötesh möhlitining chiqiriwétilishige a'it metbu'at uchurliri tarqilip, buning shi jinpingning ebediy re'is bolush arzusining ipadisi ikenliki tehlil qiliniwatqanda xitay kompartiyisining yene bir aliy derijilik rehbiri kadiri, mongghul millitidin kélip chiqqan yang jingning wezipisidin qaldurulghanliqimu tengla otturigha chiqti.

Xitay hökümet metbu'atliridin shinxu'a agéntliqi 18-nöwetlik kompartiye merkizi komitéti sékrétariyatining sékrétari, dölet ishliri komissari we dölet ishliri kabinéti bash katipi yang jingning wezipisidin qaldurulup, uning üstidin délo turghuzulup tekshürüshke bashlan'ghanliqi ashkarilandi. 

Xitay merkizi intizam tekshürüsh komitéti uning "Siyasiy intizam we siyasiy qa'idige xilapliq qilghanliqi", "Uzun mezgil qanunsiz karxanichilar we jem'iyettiki qanunsiz kishiler bilen alaqe qilghanliqi", hem "Zor shexsiy payda üchün qulayliq shara'it hazirlighanliqi" qatarliq jinayetlirini körsetken.

Yang jing köp yillar milliy rayonlarda xizmet qilghan bolup, u ichki mongghulning ordos rayonidiki jungghar aymiqidin idi. Ichki mongghul uniwérsitétining xitay til-edebiyat kespini püttürgen, bu yil 64 yashqa kirgen yang jing 2003-yili, ichki, mongghul aptonom rayoni re'isi we 2008-yilidin kéyin xitay memliketlik milliy ishlar komitétining mudiri hem xitay kompartiyisi birliksep idarisining mu'awin bashliqi bolghan.

Yang jing mongghullar arisida xitay mu'awin dölet re'isi bolghan ulanfudin kéyin merkizi hakimiyet we kompartiye merkizi komitétida yuqiri hoquq tutqan mongghul hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet