Özini haqaretligen 4 xitayni öltürgen mongghul yash tutqun qilin'ghan

Muxbirimiz méhriban
2016-11-29
Share

Ichki mongghulning shilin'ghul aymiqidiki saqchi idarisi 26-noyabir uqturush chiqirip, 4 ademni öltürgen qatil xurunchini tutushqa yardem qilghanlargha 30 ming som söyünche bérilidighanliqini jakarlighan. Emma mezkur weqe heqqide 29-noyabir seyshenbe künige qeder xitay taratqulirida héchqandaq xewer bérilmigen.

Düshenbe küni radi'omizgha ehwalni bildürgen mongghul charwichilar, weqening 25-noyabir yüz bergenlikini, nöwette gumandar dep tutqun qilin'ghan 38 yashliq mongghul charwichi xorunchigha, u yallinip padilirini béqiwatqan xitay xojayin wéy jyen'go we uning wéy jyenchi, wéy jyenchén, en shawping qatarliq 3 tughqinini öltürdi dégen jinayet artilghanliqini, mongghul charwichi xorunchining xitay xojayinning qoylirini béqish jeryanida xojayin we uning yéqinlirining haqaret qilishigha, bozek qilishigha uchrighanliqini, bolupmu qatilliq yüz bergen küni xurunchi bilen xitay xojayin wéyning yéqinliri otturisida qattiq jédel bolghanliqini bildürüshti.

Emma, shilin'ghul aymiqi saqchi idarisidin ziyaritimizni qobul qilghan xitay saqchi xadimi xurunchu teripidin öltürülgen 4 kishining 2 si xitay, ikkisi mongghul ikenlikini bildürüp, weqening yüz bérish sewebi tekshürülüwatqanliqni, shunga téximu köp tepsilatlarni ashkarilimaydighanliqini bildürdi. Radiyomiz ziyaritini qobul qilghan mongghul pa'aliyetchi xada öz qarishini bayan qildi, u, yéqinqi yillardin buyan shilin'ghul yayliqida xitay shirketlirining kan échish namida mongghul charwichilirining yaylaqlirini igiliwéliwatqanliqini, hetta yaylaqqa türküm-türkümlep kéliwatqan xitay sodigerlerning yerlik charwichilarning qoy, kalilirini erzan bahada sétiwélip, hökümetning arqa tirek bolushi bilen yaylaqta qoy férmiliri quruwatqanliqini bildürdi. Mongghul charwichilarning ulargha padichi bolushqa mejbur boluwatqanliqini tekitligen xada, bu xil amillarning rayondiki yerlik mongghular bilen köchmen xitaylar otturisidiki ziddiyetni keskinleshtürüp, ene shundaq paji'elerge seweb boluwatqanliqini otturigha qoydi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet