Muhajirettiki Uyghur siyasiy pa'aliyetchilirining töligen bedelliri diqqet qozghimaqta

Yéqinqi mezgillerdin buyan xitayning Uyghur diyaridiki siyasiy basturushning biwaste ziyankeshlige uchrawatqan uruq-tughqanliri we bashqa yéqinlirining külpetliri üchün chet ellerdiki köpligen Uyghurlar kökrek kérip otturigha chiqqan idi. Tutqun qilin'ghan a'ile ezaliri üchün guwahliq bergen bu Uyghurlar gerche chet ellerde yashawatqan bolsimu, emma ularning xitay hökümitining “Intiqam élishi” din xalas bolalmighanliqi, yéqindin buyan yéngiwashtin diqqet qozghashqa bashlidi. 

“Kishilik hoquqni közitish teshkilati” xitay bölümining diréktori sofi richardson xanimning 9-iyun küni özlirining tor bétide élan qilin'ghan bu heqtiki maqaliside mushu mesile yene bir qétim eslitip ötüldi. Uning éytishiche, zor bir türküm pidakar Uyghur muhajirlirining yurtliridiki uruq-tughqanliri bilen bolghan eng eqelliy alaqilishish heqliri tartiwélin'ghan bolsa, yene bir türküm Uyghur dawagerlirining uruq-tughqanliri türlük bahaniler bilen éghir qamaq jazalirigha höküm qilinmaqta iken.

Sofi richardson xanim buninggha misal qatarida dolqun eysa, roshen abbas, gülchéhre xoja qatarliqlarni misal alidu. Bolupmu dunya Uyghur qurultiyining re'isi dolqun eysaning lagérda ölüp ketken anisi ayxan memet we 86 yéshida wapat bolghan dadisi eysa memetning ölüm xewirini nechche yillardin kéyin anglighanliqi, inisi xushtarning atalmish “Térorluq” jinayiti bilen eyiblinip muddetsiz qamaqqa höküm qilin'ghanliqi, washin'gton shehridiki Uyghur herkiti teshkilatining re'isi roshen abbasning pénsiyege chiqqan hedisi gülshen abbasning 20 yilliq qamaqqa höküm qilin'ghanliqini tilgha alidu. U bu “Rohiy jaza” larning emeliyette ularning Uyghur dawasi üchün töligen éghir bedellirining bir qisimi ikenliki'ini körsitip ötidu.

Sofi richardson xitay hökümitining mushu xildiki “Yiraqtin qisas élish” herkiti toghrisida radiyomiz ziyaritini qobul qilghanda, “Bu emeliyette xitay hökümitining qanun boyiche idare qilinmaydighan bir hakimiyet ikenlikining eng roshen ispati” dep körsetken idi.