Хитай һөкүмитиниң чәтәлләрдики уйғурларни зор күч билән пайлаватқанлиқи диққәт қозғиди

Мухбиримиз әзиз
2019-12-12
Елхәт
Пикир
Share
Принт

Уйғур дияридики торлашқан назарәтниң аллиқачан хитай чеграсидин һалқип чиққанлиқи көп тәрәпләрдин мәлум болмақта. Болупму чәтәлләрдики уйғур паалийәтчиләрниң буниңда нуқтилиқ пайлаш нишаниға айлиниши буниңда әң типик һадисә икән.

«З хәвәр мулазимити» торида 11-декабир күни елан қилинған тимосий нерози имзасидики мақалида хитай һөкүмитиниң мәхсус америка пуқралиқини алған уйғурларниң пейида болуватқанлиқи баян қилиниду. Мақалида көрситилишичә, йеқинда мәлум болған хитай һөкүмитиниң «бирләшмә уруш суписи» намидики қоманданлиқ мәркизиниң айлиқ хәвәрнамисиниң биридә «шинҗаңдин 1535 киши чәтәл пуқралиқини алған болуп, булар өз нөвитидә бизниң әлчиханилиримизға виза илтимаси тапшурған,» дейилиду.

Йеқинда америка авам палатаси мутләқ үстүн аваз билән мақуллиған «уйғур кишилик һоқуқ қанун лайиһәси» диму америкадики уйғурларниң мушу хилдики паракәндичиликкә учраватқанлиқи алаһидә баян қилиниду.

Әнглийәдә нәшр қилинидиған «симлиқ хәвәрләр» торида елан қилинған морган мейкерниң бу һәқтики мақалисидә америкадики уйғур һәрикити тәшкилатиниң рәиси рошән аббасниң америка дөләт мәҗлисидә уйғурлар дияридики зор тутқун һәққидә гуваһлиқ берип әтисила тор бетиниң һуҗумға учриши, дуня уйғур қурултийиниң тор бети көп қетимлап намәлум тор хаккерлириниң бузғунчилиқ характердики һуҗумлириға учриши тәпсилий баян қилинип, «хитай һазир өзлириниң дүшмәнлиригә тор дунясида барлиқ васитиләрдин пайдилинип һуҗум қозғимақта, шундақла уларни қаттиқ пайлимақта,» дейилиду.

Мақалида көрситилишичә, хитай даирилири чәтәлләрдики уйғурларға учур йоллап уларни хитай һөкүмитиниң пайдисиға сөз қилиш яки өзлири хизмәт қиливатқан уйғур тәшкилатлиридин айрилишқа қизиқтурмақта икән. «Уйғур кишилик һоқуқ қурулуши» тәшкилатиниң хадими грег фай бу тоғрисида сөз қилип «илгири хитай һөкүмити чәтәлләрдики уйғур тәшкилатлирини пайлап кәлгән болса, һазир улар нуқтилиқ шәхсләрни нишан қилишқа йүзлиниватиду,» дегән.

Пикирләр (0)
Share
Толуқ бәт