Xitay hökümitining chet'ellerdiki Uyghurlarni zor küch bilen paylawatqanliqi diqqet qozghidi

Muxbirimiz eziz
2019-12-12
Élxet
Pikir
Share
Print

Uyghur diyaridiki torlashqan nazaretning alliqachan xitay chégrasidin halqip chiqqanliqi köp tereplerdin melum bolmaqta. Bolupmu chet'ellerdiki Uyghur pa'aliyetchilerning buningda nuqtiliq paylash nishanigha aylinishi buningda eng tipik hadise iken.

"Z xewer mulazimiti" torida 11-dékabir küni élan qilin'ghan timosiy nérozi imzasidiki maqalida xitay hökümitining mexsus amérika puqraliqini alghan Uyghurlarning péyida boluwatqanliqi bayan qilinidu. Maqalida körsitilishiche, yéqinda melum bolghan xitay hökümitining "Birleshme urush supisi" namidiki qomandanliq merkizining ayliq xewernamisining biride "Shinjangdin 1535 kishi chet'el puqraliqini alghan bolup, bular öz nöwitide bizning elchixanilirimizgha wiza iltimasi tapshurghan," déyilidu.

Yéqinda amérika awam palatasi mutleq üstün awaz bilen maqullighan "Uyghur kishilik hoquq qanun layihesi" dimu amérikadiki Uyghurlarning mushu xildiki parakendichilikke uchrawatqanliqi alahide bayan qilinidu.

En'gliyede neshr qilinidighan "Simliq xewerler" torida élan qilin'ghan morgan méykérning bu heqtiki maqaliside amérikadiki Uyghur herikiti teshkilatining re'isi roshen abbasning amérika dölet mejliside Uyghurlar diyaridiki zor tutqun heqqide guwahliq bérip etisila tor bétining hujumgha uchrishi, dunya Uyghur qurultiyining tor béti köp qétimlap namelum tor xakkérlirining buzghunchiliq xaraktérdiki hujumlirigha uchrishi tepsiliy bayan qilinip, "Xitay hazir özlirining düshmenlirige tor dunyasida barliq wasitilerdin paydilinip hujum qozghimaqta, shundaqla ularni qattiq paylimaqta," déyilidu.

Maqalida körsitilishiche, xitay da'iriliri chet'ellerdiki Uyghurlargha uchur yollap ularni xitay hökümitining paydisigha söz qilish yaki özliri xizmet qiliwatqan Uyghur teshkilatliridin ayrilishqa qiziqturmaqta iken. "Uyghur kishilik hoquq qurulushi" teshkilatining xadimi grég fay bu toghrisida söz qilip "Ilgiri xitay hökümiti chet'ellerdiki Uyghur teshkilatlirini paylap kelgen bolsa, hazir ular nuqtiliq shexslerni nishan qilishqa yüzliniwatidu," dégen.

Toluq bet