“Uyghur irqiy qirghinchiliqi: hoquq, kimlik we medeniyetni qoghdash” témisidiki muhakime-körgezme yighini amérikaning paytexti washin'gtonda bashlandi

Uyghur akadémiyesi bash bolup teshkilligen “Uyghur irqiy qirghinchiliqi: milliy kimlik we medeniyetni qoghdash” témisidiki muhakime-körgezme yighini 4-dékabir küni amérikaning paytexti washin'gtonda bashlandi. Bu yighin'gha yene dunya Uyghur qurultiyi, Uyghur herikiti teshkilati, amérika Uyghur jem'iyiti qatarliq teshkilatlar hemkarlashqan.

4-Dékabir künidin 7-dékabir künigiche dawam qilidighan bu 3 künlük yighinda Uyghurlar irqiy qirghinchiliqqa duch kéliwatqan bir peytte, Uyghur milliy kimliki we medeniyitini qoghdap qélish we Uyghur dawasining tesirini ashurushqa da'ir muhim témilar boyiche ilmiy doklat bérish, guwahliq bérish yighini, resim körgezmiliri we yumilaq üstel söhbetliri ötküzülmekchi. Mezkur yighin'gha dunyaning herqaysi jayliridin kelgen tetqiqatchilar, kishilik hoquq mutexessisliri, ilmiy xadimlardin bolup köpligen kishi qatnishidu.

Yighin 4-dékabir küni etigende amérika kommunizm qurbanliri xatire fondi binasida ötküzülgen échilish murasimi bilen bashlan'ghan bolup, murasimda Uyghurlarning medeniyet we kishilik hoquq saheliridiki tonulghan zatlar söz qildi.

Kün tertipke asasen, 4-dékabir chüshtin kéyin amérika dölet mejliside “Uyghur irqiy qirghinchiliqi: hoquq, kimlik we medeniyetni qoghdash” namliq resim körgezmisi échilidighan bolup, bu körgezmige tod sétyin (Todd Stein) qatarliq dölet mejlis ezaliri qatnishidiken.

5-Dékabir küni yene, amérika dölet mejliside “Xitay kompartiyesining tarixni özgertish we medeniyetni yoqitishi” mawzuluq guwahliq bérish yighini ötküzülidighan bolup, bu yighinda doktor rishat abbas qatarliqlar söz qilidiken.

Uyghur akadémiyesining yighini 6-we 7-öktebir künliri amérika tashqi ishlar ministirliqi we hemde amérika tinchliq instituti qatarliq orunlarda ötküzülidighan yumilaq üstel yighinliri bilen dawam qilidiken.