“Uyghur qirghinchiliqini buzush” témisidiki muhakime yighini nyu-york waqti gézitide xewer qilindi

Washin'gtondin muxbirimiz irade teyyarlidi
2024.04.18

Amérikadiki éliy wizél (Elie Wiesel‪) fondi, dunya Uyghur qurultiyi we Uyghur kishilik hoquq qurulushi bilen birlikte chaqirghan “Uyghur qirghinchiliqini buzush” témisidiki muhakime yighini nyu-york waqti géziti teripidin xewer qilin'ghan.

Gézit xewiride nobél mukapati sahibi, yehudiy qirghinchiliqidin aman qalghan yazghuchi éliy wizél namida qurulghan bu fondi jem'iyetning re'isi hem shundaqla éliy wizélning oghli élisha wizélni ziyaret qilip, Uyghur irqiy qirghinchiliqi we hemde bu fondining Uyghurlar üchün qiliwatqan pa'aliyetlirining sewebini sorighan.

Élisha wizél buninggha jawaben, 2021- yili özining Uyghur lagér shahiti gülbahar xatiwaji xanim yazghan “ Men xitayning lagéridin qandaq qutuldum” namliq kitabini oqughandin kéyin Uyghurlargha qarita yüz bériwatqanlar bilen yehudiy qirghinchiliqida yüz bergenler otturisida nahayiti zor oxshashliq barliqini hés qilip heyran qalghanliqini éytqan. U, “Xitay hökümitining bir xelqni yoqitish iradisi manga dadamning sergüzeshtlirini esletti” dégen.

Élisha wizél shundin kéyin özining bu mesile heqqide chongqurlap izdinishke bashlighanliqi we bu qirghinchiliqqa diqqet tartish üchün heriket qilip kelgenlikini éytqan. U nyu-yorkta échiliwatqan bu yighinningmu mana bu tirishchanliqning mehsuli ikenlikini bildürgen.

Élisha wizél sözide yene, bu yighin arqiliq amérikadiki yehudiylar we musulmanlarni öz ichige alghan her xil dinlar wekillirining bir arigha jem bolup Uyghur xelqi uchrawatqan zulumgha ortaq qarshi turush we ortaq tirishchanliq körsitish iradisini namayan qilghanliqini, özining buningdin tolimu xursen bolghanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.