Dangliq boksyorchi muhemmed alining qizi, xitay hökümitini Uyghurlarni basturushni toxtitishqa chaqirdi

Muxbirimiz erkin
2023.02.24

Amérikaning dunyagha dangliq musulman boksyorchisi we jama'et erbabi merhum muhemmed alining qizi meryem ali xitay hökümitini Uyghur musulmanlirini basturushni toxtitishqa chaqirghan.

“Amérika awazi” radiyosining xewer qilishiche, özimu ‍ijtima'iy pa'aliyetchi bolghan meryem ali 22-féwral küni “Amérika awazi” radiyosigha söz qilip, xitay hökümitige qarita bu chaqiriqta bolghan. Meryem ali mundaq dégen: “Xitay hökümiti musulmanlarni jazalashni toxtitishi kérek, bundaq qilish xata. Ularning öz étiqadi boyiche ibadet qilishigha yol qoyulushi kérek. Men ularning qanchilik küchi bolsa bolsun, musulmanlarni jazalimaymu, ‍özining küchini saqlap qélish yoli barliqigha ishinimen. Ularni jazalash bek heddidin ashqanliq.”

Meryem ali, 20-esirdiki eng dangliq tenherketchilerning biri, dep qaralghan we 2016-yili parkinson késili sewebidin wapat bolghan muhemmed alining 9 perzentining eng chongi bolup, bu uning Uyghurlarni tunji qétim tilgha élishi emes. “Amérika awazi” radiyosining xewiridin melum bolushiche, meryem ali, eger dadisi shi jinping hökümitining musulmanlargha qilghan zulumi we ziyankeshliklirini bilse, buninggha choqum qarshi turudighanliqini éytqan. Muhemmed ali 1979-yili amérika bilen xitay diplomatik munasiwet ornatqandin kéyin, xitayni ziyaret qilishqa teklip qilin'ghan.

U eyni waqitta sabiq xitay rehbiri déng shyawping bilen körüshkende, xitayning 20 yildin köprek waqittin béri boks tenterbiyesige qoyghan cheklimisini bikar qilishini telep qilghan idi. Meryem ali dadisining “Qur'an” da déyilgenlerge ishen'genliki, “Qur'an” da “Dinda zorlash yoq” déyilgenliki, kishilerni öltürüshke we ulargha bésim qilip zorlashqa bolmaydighanliqini bildürüp: “Emeliyette istibdat hökümetler erkin pikir qilghuchilarni xalimaydu” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.