Ürümchi, sanji we shixenze sheherlirining hawa bulghinishi heqqide sériq renglik agahlandurush chiqirildi

Uyghur aptonom rayonluq hawa bulghinishini közitish orni 14‏-dékabirdin bashlap Uyghur élining ürümchi, sanji we shixenze sheherlirining hawa bulghinish ehwali heqqide sériq renglik agahlandurush chiqarghan.

“Shinjang géziti” ning 13‏-dékabir xewer qilishiche, Uyghur aptonom rayonluq muhit közitish ponkitining telipige bina'en Uyghur aptonom rayonluq hawa bulghinishqa taqabil turush qomandanliq ishxanisi 14‏-dékabir sa'et 10 din bashlap yuqiriqi 3 sheherde sériq renglik agahlandurush chiqirishni qarar qilghan.

Uyghur aptonom rayonining hawa bulghinishi yéqinqi yillardin buyan dawamliq éghirliship, xelqning salametlikige tehdit séliwatqan jiddiy mesilige aylan'ghan. Xelq'ara yéshil tinchliq teshkilati 2016‏-yili élan qilghan tekshürüsh doklatida xitaydiki hawasi eng éghir bulghan'ghan 10 sheherning 6 sining Uyghur aptonom rayonida ikenliki, 6 sheherning ichide qeshqer hawasi eng éghir bulghan'ghan sheher ikenlikini bildürgen idi.

Yéshil tinchliq teshkilatining bildürüshiche, Uyghur rayonidiki sheherlerning her kwadrat küp métir hawasining terkibidiki 2.5 pm Namliq zeherlik maddining miqdari 100 mikrogramdin éship ketken. Bu dunya sehiye teshkilatining ölchimidin 10 hesse éship ketken. Uyghur aptonom rayonluq hawa bulghinishqa taqabil turush qomandanliq ishxanisi 13‏-dékabir chiqarghan agahlandurushida balilar, yashan'ghanlar, yürek, nérwa we qan tomur késili barlar talagha chiqmasliqni, mekteplerning derstin sirtqi pa'aliyetlirini azaytishni, par qazan, aptomobil, sana'et we qurulush orunlirining meshghulatini kontrol qilishni telep qilghan.

Muhit qoghdighuchilar ilgiri xitay da'irilirini Uyghur rayonida keng kölemlik zawut-karxanilarni qurup rayon'gha ahale köchürüsh shundaqla ghulja qatarliq jaylarda kömür zawutlirini qurush rayonning nazuk muhitigha éghir buzghunchiliq élip kélidu dep agahlandurghan bolsimu, lékin xitay hökümiti bu agahlandurushlargha qulaq salmighan idi.