"Uyghur aptonom rayonining muhit qoghdash belgilimisi" kéler yili 1-yanwardin étibaren yolgha qoyulidiken

Muxbirimiz qutlan
2016-12-17
Share

Igilinishiche, 12-ayning 16-küni Uyghur aptonom rayonluq xelq qurultiyi axbarat élan qilish yighini échip, "Uyghur aptonom rayonining muhit qoghdash belgilimisi" ni testiqlighanliqini bildürgen.

Tengritagh torining bu heqtiki xewirige qarighanda "Uyghur aptonom rayonining muhit qoghdash belgilimisi" 2017-yili 1-ayning 1-künidin étibaren yolgha qoyulidiken.

Bu tipik ichkiy quruqluq iqlimigha mensup, ékologiyelik sezgürliki eng küchlük bolghan, xitay téritoriyesining altidin bir qismini igileydighan Uyghur aptonom rayonida tunji qétim muhit asrash heqqide chiqirilghan bir belgilime iken.

Közetküchiler, Uyghur aptonom rayoni xitay boyiche muhit mesilisi eng éghir, su menbesi eng kemchil, bostanliq kölimi eng kichik bolghan rayon bolushigha qarimay hazirgha qeder öz aldigha muhit qoghdash heqqide ünümlük bolghan qanuniy belgilimisining bolmighanliqini tekitlimekte.

Mutexessislerning qarishiche, Uyghur aptonom rayonidiki ékologiyelik muhitning buzulushi xitayning bashqa herqandaq ölke we aptonom rayonlirigha qarighanda eng éghir bolup, néfit, tebi'iy gaz we bashqa yer asti bayliqlirining adettin tashqiri qézilishi bu yerning muhitini nacharlashturiwetken.

Ular birdek, "Muhit qoghdash belgilimisi" ning Uyghur aptonom rayonida emdilikte yolgha qoyulmaqchi bolghanliqi "Muhitni buzup bolup qayta ongshashqa urunushtin bashqa nerse emes", dep hésablimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet