Уйғур елидә маарип саһәсини муқимлиққа хизмәт қилдуруш истратегийәси елан қилинди

Хитай башқурушидики “тәңритағ тори” ниң 17-декабирдики хәвиригә қариғанда, шу күни “шинҗаң маарип йиғини” үрүмчидә чақирилған. Йиғинға уйғур елидики асаслиқ каттибашлардин башқа һәрқайси вилайәт, шәһәр вә наһийәләрниң маарипқа мәсул башлиқлири қатнашқан.

Хәвәрдә ейтилишичә, уйғур аптоном районлуқ парткомниң секретари ма шиңруй йиғинда алаһидә сөз қилип “мәмликәтлик маарип йиғининиң роһини изчиллаштуруш, партийәниң йеңи дәврдики шинҗаңни идарә қилиш истратегийәсини толуқ вә омумйүзлүк иҗра қилдуруш, буниң үчүн маарипта күчлүк район бәрпа қилиш арқилиқ хитайчә алаһидиликкә игә заманивилаштурушни әмәлгә ашуруш” ни тәкитлигән. Шундақла маарип хизмитини “шинҗаңда узун мәзгиллик әминликни әмәлгә ашуруш” ниң әң түплүк асаси қилип чиқишни тәләп қилған.

Ма шиңруйниң “шинҗаңда маарипни тәрәққий қилдуруш” һәққидики баянлирида сиясий еңи юқири болған мәктәп рәһбәрлирини барлиққа кәлтүрүш, оқутқучиларниң сиясий сапасини өстүрүш, “алий мәктәп оқуғучилирини җәнубий шинҗаңда йилтиз тартип қелишқа сәпәрвәр қилиш” дегәндәк мәзмунларниң орун елиши бу қетимқи йиғинда йиллардин буян йүргүзүлүватқан “хитайлаштуруш” сияситиниң техиму чоңқур иҗра қилиниши һәққидики йолйоруқ икәнликидин дерәк бәргән.

Һалбуки уйғур елидики маарип саһәси хитай һөкүмитиниң қирғинчилиқида әң зор дәриҗидә вәйран қиливетилгән саһә болуп, уйғур тили вә йезиқи, уйғур мәдәнийити, уйғур миллий кимлики һәққидики барлиқ мәзмунлар маариптин сиқип чиқирилған. Униң орниға “җуңхуа ортақ кимлики” чүшәнчисини омумлаштуруш мәзмунидики маарип идийәси барлиқ маарип саһәсигә теңилған иди. Бу қетимқи маарип йиғинида маарипни “узун мәзгиллик әминлик бәрпа қилиш” ниң түп йетәкчи идийәси қилишниң оттуриға қоюлуши бу хилдики “җуңхуа маарипи” ниң йеқин кәлгүсидә техиму зор көләмдә вә салмақта иҗра қилинишидин бешарәт, дәп қаралмақта.