Ма шиңрүй “юқири сүпәтлик тәрәққиятни җәнубий шинҗаңға кеңәйтиш” үчүн “муқимлиқ вә террорлуққа қарши күрәшни даимлаштуруш” ни тәкитлигән

Вашингтондин мухбиримиз әзиз тәйярлиди
2023.10.17

Хитай һөкүмити башқурушидики “тәңритағ тори” ниң 17-өктәбирдики хәвиридә ейтилишичә, алдинқи күни үрүмчи шәһиридә “аптоном районлуқ юқири сүпәтлик тәрәққият (җәнубий шинҗаң райони) ” иккинчи нөвәтлик йиғини чақирилған. Йиғинда уйғур аптоном районлуқ парткомниң секретари ма шиңрүй алаһидә сөз қилип, бу саһәдики бир қисим муһим нуқтиларни шәрһләп өткән. Бу қетимқи йиғинға партийә, һөкүмәт вә һәрқайси вилайәт-шәһәрләрниң муһим рәһбәрлириниң толуқ қатнашқанлиқи, буниң бир қетимлиқ зор хизмәт орунлаштуруши икәнликидин бешарәт бәргән.

Хәвәрдә ейтилишичә, ма шиңрүй сөзидә “юқири сүпәтлик тәрәққият” темисиниң “партийәниң йеңи дәврдики шинҗаңни идарә қилиш истратегийәси” ниң бир муһим мәзмуни икәнликини, бу җәһәтләрдики хизмәтләрни қайта тәтқиқ қилиш вә қайта орунлаштуруш, шу арқилиқ “җәнубий шинҗаңниң юқири сүпәтлик тәрәққиятини әмәлгә ашуруш” лазимлиқи һәққидә тохталған.

Ма шиңрүй сөзидә “җәнубий шинҗаң хизмитиниң шинҗаң хизмитидә пәвқуладдә орунни игиләйдиғанлиқи” ни, шуңа буни оңушлуқ әмәлгә ашуруш үчүн “муқимлиқ хизмитини даимлаштуруш, бөлгүнчилик вә террорлуққа қарши туруш хизмитини бир секунтму тохтитип қоймаслиқ” , хитай тил-йезиқи маарипини омумйүзлүк күчәйтиш, җуңхуа кимлики чүшәнчисини чоңқурлаштуруш, ислам динини хитайчилаштуруш қатарлиқ хизмәтләрни қәтий тәврәнмәстин давам қилдуруш лазимлиқини оттуриға қойған. Униң бу хилдики зорлуқ шәклини алған ассимилятсийә тәдбирлирини ашкара оттуриға қоюши, хитай һөкүмитиниң дәсләпки қәдәмдә уйғур диярида һәрқандақ шәкилдики қаршилиқ амиллирини пүтүнләй йоқитип болғандин кейинки иккинчи басқучлуқ хизмәт, дәп қаралмақта.

Хитай һөкүмитиниң уйғур дияридики “юқири сүпәтлик тәрәққият” қурулуши һәққидә радийомиз зияритини қобул қилған мутәхәссисләрдин доктор адриян зенз бу хилдики “тәрәққият” ниң нишани йәрлик уйғурлар әмәс, әксичә уйғур дияриға зор санда көчүрүлүп келиниватқан хитай аққунлири икәнликини, буниң маһийәттә “җәнубий шинҗаңдики уйғур нопусиниң мутләқ үстүнлүкни игиләш” вәзийитини бузуп ташлаш, шу арқилиқ “җәнубий шинҗаңда шималий шинҗаңға охшаш хитай нопуси үстүнлүкни игиләш” вәзийитини яритишни көзләватқанлиқини тәкитлигән иди.

Ма шиңрүйниң бу қетимқи “җәнубий шинҗаңниң юқири сүпәтлик тәрәққияти” йиғинда сөзлигән сөзи, хитайниң уйғур дияридики юқири бесимлиқ контроллуқ вә бастуруш тәдбирлириниң бундин кейин техиму қаттиқ иҗра болидиғанлиқидин бешарәт бәрмәктикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.