Елана бейсир: "нәччә йүзлигән мухбирларниң тутулуши дунядики йеңи бир ‹нормаллиқ' қа айланди"

Мухбиримиз сада
2018-12-13
Share

13-Декабир күни "мухбирларни қоғдаш комитети" торида "нәччә йүзлигән мухбирниң тутулуши дунядики йеңи бир ‹нормаллиқ' қа айланди" сәрләвһилик бир муһакимә мақалиси елан қилинған.

Елана бейсир мақалисидә дуняниң һәрқайси әллиридин 251 дин артуқ ахбарат хадиминиң тутқун қилинип түрмигә ташланғанлиқи, буларниң ичидә хитай, мисир вә сәуди әрәбистан қатарлиқ дөләтләрдә тутқун қилинған мухбирлар саниниң бултурқидин көп икәнлики, түркийәниң дунядики әң начар тутқун қилғучи дөләт, дәп аталғанлиқини баян қилған.

Мақалидә хитайниң мухбирларни тутқун қилиш әһвали нуқтилиқ тонуштурулуш арқилиқ уйғур дияридики һөкүмәтниң зиянкәшликигә учриған уйғурларниң әң йеңи вәзийити ечип берилгән.

Хитай һөкүмити уйғур дияриниң өзидинла әң аз дегәндә 10 дәк ахбарат хадимини сәвәбсиз тутқун қилған. Буниң ичидә һазирға қәдәр әң диққәтни тартиватқини хитай фотограф лү гуаң болған. Лү гуаң бу йил 11-ай мәзгилидә уйғур дияриға мәлум көргәзмигә қатнишиш үчүн үрүмчигә барғандин кейин тутқун қилинған.

Мақалидә йәнә хитай рәиси ши җинпиңниң 2013-йили тәхткә олтурғандин кейин, өзиниң һоқуқини күчләндүргәнлики қәйт қилинғандин башқа йәнә хитай һөкүмәт хадимлириниң "тор мудапиә теми" (防火墙) техникисини қаттиқ назарәт астиға елип, һөкүмәткә пайдилиқ болған бир қанчила хәвәр тор бәтлириниң аталмиш "тәстиқтин өткән" дегән намға еришкәнликиму нуқтилиқ чүшәндүрүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт