Хитай даирилири «намратлиқтин қутулдуруш» намида уйғурларниң һойла-арам мәдәнийитини вәйран қилмақта

Мухбиримиз әзиз
2020-07-31
Елхәт
Пикир
Share
Принт

Хитай һөкүмити өткән йиллардин буян «әсәбийликкә қарши туруш» намида ‍уйғурларниң өй ичи қурулмисини хитайчә шәкилгә охшитишқа күч сәрп қилған иди. Әмдиликтә уларниң уйғурлардики миң йилларчә давам қилип кәлгән һойла-арам мәдәнийитини өзгәртмәкчи болуши зор диққәт қозғашқа башлиди.

Хитай һөкүмитиниң башқурушидики шинхуа агентлиқиниң 30-июлдики хәвиридә ейтилишичә, йәркән наһийиси ават йезиси йеқинда йеңи ариш кәнтини «намратлиқтин қутулдуруш вә йеңичә гүзәл һойла-арам бәрпа қилиш үлгилик кәнти» қилип қуруп чиққан. Нөвәттә бу кәнттики барлиқ уйғурлар кәнткә хизмәткә чүшкән хитай секретар җоң хәнниң «гүзәл һойла бәрпа қилиш» чақириқи бойичә һойлилириға пәмидур, қизилмуч, педигән дегәндәк көктатларни теришни башливәткән.

Хәвәрдә ейтилишичә, қош ериқ йезисида мәзкур чақириққа аваз қошуп барлиқ қоршав тамлар, очақлар чеқип ташланған. Шуниңдәк кишиләрниң һойлисиға үзүм бариңи ‍орнитиш, мевилик көчәт тикиш дегәндәк йеңилиқларниң пәйда болғанлиқи тәкитләнгән.

Америкадики мәдәнийәт тәтқиқатчиси, доктор қаһар барат әпәнди бу һәқтә пикир қилип: «уйғурлар миң йиллардин буян һойлиға үзүм бариңи тикиш, һойлини гүл-чечәккә толдурушни адәт қилған бир хәлқ. Һойлиға көктат териш қорсақтин башқа ғеми йоқ хитайларниң адити,» деди. Шуниңдәк бу һәрикәтләрниң әмәлийәттә хитай һөкүмитиниң уйғур миллий кимликини йоқитиш қилмишиниң бир қисми икәнликини алаһидә тәкитлиди.

Пикирләр (0)
Share
Толуқ бәт