Шималий атлантик әһди тәшкилатиниң баш секритари: “мустәбит рәһбәрләр қораллиқ күч ишләтсә тегишлик җавабини алиду”

Шималий атлантик әһди тәшкилати (NATO)ниң баш секритари җенс столтенберг, 5-январ күни норвигийәдә өткүзүлгән бир йиғинда нутуқ сөзләп, әгәр мустәбит рәһбәрләр қорал ишләтсә, тегишлик җавабқа еришидиғанлиқини билдүргән. Столтенбергниң ейтишичә, демократик дөләтләр русийәниң украинаға қораллиқ һуҗум қилишидин савақ елиши, хитайдәк мустәбит дөләтләргә тайинип қелиштин сақлиниши керәк икән.

Столтенберг “норвегийә карханичилар бирләшмиси” ниң йиллиқ йиғинида қилған сөзидә, әгәр путин украина урушида ғәлибә қилса, буниң укра‍налиқлар үчүн трагедийә, өзлири үчүн бир хәтәр болидиғанлиқини билдүрүп: “путинға вә башқа мустәбит рәһбәрләргә йәткүзүдиған учур шуки, әгәр улар һәрбий күч ишләтсә, тегишлиқ җавабқа еришиду” дегән.

Столтенбергниң ейтишичә, ғәрб дөләтлири украина урушидин шу савақларни елиши, болупму мудапийәни күчәйтиши, мустәбит дөләтләргә тайинип қелиштин сақлиниши керәк икән. У мундақ дигән: “биз бу хаталиқни башқа мустәбит дөләтләргә тәкрарлимаслиқимиз, болупму хитайға тәкрарлимаслиқимиз керәк. Биз һалқилиқ хам әшя вә мәһсулатларда еғир дәриҗидә тайинип қелиш арқилиқ өзимизни аҗизлаштурмаслиқимиз, биз өз нөвитидә бизгә тәһдит селишқа ишлитилидиған техникиларни експорт қилмаслиқимиз шәрт.”

Униң ейтишичә, демократик дөләтләр порт, төмүрйол, телефон алақиси вә G5 тор қурулуши қатарлиқларда контроллиқни йоқитип қоймаслиқи керәк икән. У йәнә “биз билән хитай давамлиқ сода қилсақму, лекин биз буни чоқум бихәтәрликимизгә зиян йәткүзмәйдиған усуллар билән елип беришимиз керәк” дегән.