Shimaliy atlantik ehdi teshkilatining bash sékritari: “Mustebit rehberler qoralliq küch ishletse tégishlik jawabini alidu”

Shimaliy atlantik ehdi teshkilati (NATO)ning bash sékritari jéns stolténbérg, 5-yanwar küni norwigiyede ötküzülgen bir yighinda nutuq sözlep, eger mustebit rehberler qoral ishletse, tégishlik jawabqa érishidighanliqini bildürgen. Stolténbérgning éytishiche, démokratik döletler rusiyening ukra'inagha qoralliq hujum qilishidin sawaq élishi, xitaydek mustebit döletlerge tayinip qélishtin saqlinishi kérek iken.

Stolténbérg “Norwégiye karxanichilar birleshmisi” ning yilliq yighinida qilghan sözide, eger putin ukra'ina urushida ghelibe qilsa, buning ukra'‍naliqlar üchün tragédiye, özliri üchün bir xeter bolidighanliqini bildürüp: “Putin'gha we bashqa mustebit rehberlerge yetküzüdighan uchur shuki, eger ular herbiy küch ishletse, tégishliq jawabqa érishidu” dégen.

Stolténbérgning éytishiche, gherb döletliri ukra'ina urushidin shu sawaqlarni élishi, bolupmu mudapiyeni kücheytishi, mustebit döletlerge tayinip qélishtin saqlinishi kérek iken. U mundaq digen: “Biz bu xataliqni bashqa mustebit döletlerge tekrarlimasliqimiz, bolupmu xitaygha tekrarlimasliqimiz kérek. Biz halqiliq xam eshya we mehsulatlarda éghir derijide tayinip qélish arqiliq özimizni ajizlashturmasliqimiz, biz öz nöwitide bizge tehdit sélishqa ishlitilidighan téxnikilarni éksport qilmasliqimiz shert.”

Uning éytishiche, démokratik döletler port, tömüryol, téléfon alaqisi we G5 tor qurulushi qatarliqlarda kontrolliqni yoqitip qoymasliqi kérek iken. U yene “Biz bilen xitay dawamliq soda qilsaqmu, lékin biz buni choqum bixeterlikimizge ziyan yetküzmeydighan usullar bilen élip bérishimiz kérek” dégen.