Натониң баш катипи җәнубий корийә билән японийәни зиярәт қилған

Мухбиримиз җәвлан
2023.01.31

“германийә авази” ториниң 30-январ күни хәвәр қилишичә, натониң баш катипи җенс столтенберг(Jens Stoltenberg ) 29-январдин башлап җәнубий корийә билән японийәдики 4 күнлүк зияритини башлиған болуп, бу арқилиқ хитай билән шималий корийәниң һәрбий тәһдитигә тақабил туруш, шундақла нато билән шәрқий асия дөләтлириниң достлуқини күчәйтишни мәқсәт қилған.

Столтенберг җәнубий корийәниң ташқи ишлар минситири билән көрүшкәндә, шималий корийәниң русийәниң украинаға қилған һуҗумиға ярдәм бериватқанлиқини ейтқан һәмдә җәнубий корийәни украинаға қорал ярдими беришкә риғбәтләндүрүп: “әгәр биз мустәбитләр вә зораванларниң ғәлибә қилишини халимисақ, ундақта украиналиқлар қоралға муһтаҗ, мана бу әмәлийәт” дегән. У йәнә дуняниң хитайдин келиватқан тәһдит вә хирисларға учраватқанлиқини, шуңа районлар ара һәмкарлиқни техиму күчәйтиш керәкликини тәкитлигән.

Столтенберг 31-январ күни японийә баш вәзири билән көрүшкәндин кейин бирләшмә баянат елан қилип, русийәниң украинаға һуҗум қилиши вә русийәниң хитай билән һәрбий һәмкарлиқини күчәйтиши 2-дуня урушидин кейинки дуняға әң еғир хәтәр елип кәлди, дегән.

Столтенберг йәнә хитайниң һәрбий күчини кеңәйтиватқанлиқини, әгәр русийә украина урушида ғәлибә қилип қалса, хитайниң қошна дөләтләр вә тәйвәнгә зомигәрлик қилидиғанлиқини билдүргән һәмдә “бүгүн явропада йүз бәргән ишлар әтә шәрқий асияда йүз бериши мумкин. Биз хитайдин келиватқан тәһдитни тонуп, униңға бирликтә тақабил турушимиз керәк” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.