Natoning bash katipi jenubiy koriye bilen yaponiyeni ziyaret qilghan

“Gérmaniye awazi” torining 30-yanwar küni xewer qilishiche, natoning bash katipi jéns stolténbérg(Jens Stoltenberg ) 29-yanwardin bashlap jenubiy koriye bilen yaponiyediki 4 künlük ziyaritini bashlighan bolup, bu arqiliq xitay bilen shimaliy koriyening herbiy tehditige taqabil turush, shundaqla nato bilen sherqiy asiya döletlirining dostluqini kücheytishni meqset qilghan.

Stolténbérg jenubiy koriyening tashqi ishlar minsitiri bilen körüshkende, shimaliy koriyening rusiyening ukra'inagha qilghan hujumigha yardem bériwatqanliqini éytqan hemde jenubiy koriyeni ukra'inagha qoral yardimi bérishke righbetlendürüp: “Eger biz mustebitler we zorawanlarning ghelibe qilishini xalimisaq, undaqta ukra'inaliqlar qoralgha muhtaj, mana bu emeliyet” dégen. U yene dunyaning xitaydin kéliwatqan tehdit we xirislargha uchrawatqanliqini, shunga rayonlar ara hemkarliqni téximu kücheytish kéreklikini tekitligen.

Stolténbérg 31-yanwar küni yaponiye bash weziri bilen körüshkendin kéyin birleshme bayanat élan qilip, rusiyening ukra'inagha hujum qilishi we rusiyening xitay bilen herbiy hemkarliqini kücheytishi 2-dunya urushidin kéyinki dunyagha eng éghir xeter élip keldi, dégen.

Stolténbérg yene xitayning herbiy küchini kéngeytiwatqanliqini, eger rusiye ukra'ina urushida ghelibe qilip qalsa, xitayning qoshna döletler we teywen'ge zomigerlik qilidighanliqini bildürgen hemde “Bügün yawropada yüz bergen ishlar ete sherqiy asiyada yüz bérishi mumkin. Biz xitaydin kéliwatqan tehditni tonup, uninggha birlikte taqabil turushimiz kérek” dégen.