NATO Ниң йеңи пиланида хитайға қарши техиму қаттиқ ибариләр қоллинилиши мумкин икән

Мухбиримиз әзиз
2022.06.28
Share on WhatsApp
Share on WhatsApp

“шималий атлантик әһди тәшкилати” (NATO) ниң хитай һәққидики тунҗи истратегийәлик пилани 6-айниң ахири чақирилидиған әзалар йиғинидин кейин елан қилинидикән. Бу йеңи пиланда хитайға қарши техиму қаттиқ болған ибариләрниң қоллинилиши һәққидә көплигән учурлар мәлум болмақта икән.

Ройтерс агентлиқиниң 27-июндики хәвиридә ейтилишичә, германийәдә чақирилған “санаәтләшкән 7 дөләт башлиқлири йиғини” (G7) дин кейинла башлинидиған NATO ниң әзалар йиғинида русийә билән хитайниң украина урушидики һәмкарлиқ мәсилиси, шуниңдәк хитайниң дуня сиясий җуғрапийәсини өзгәртиш урунушиға қарита қандақ тәдбир көрүш мәсилиси муһакимә қилинидикән. Бу ишлардин хәвәрдар болған америка әмәлдарлириниң ройтерс агентлиқиға билдүришичә, испанийәниң мадрид шәһридә чақирилидиған NATO йиғинида, америка вә әнглийә һөкүмәтлири хитайниң күнсери ешип бериватқан һәрбий иғвагәрчиликлиригә қарши техиму қаттиқ болған тәдбирләрни елиш һәққидә тәклип беридикән.

Хитайға мәбләғ салғучи асаслиқ явропа дөләтлиридин болған германийә вә франсийәму бу еқимға аваз қошуш тәрәпдарлири икән. Ақсарайниң дөләт хәвпсизлик ишлири мәслиһәтчиси җек сулливан (Jake Sullivan) бу һәқтә мухбирларға сөз қилип: “бу йеңи истратегийәлик пиланда хитайдин келиватқан мислисиз хирислар йәр алмақчи” дегән. NATO Әмәлдарлиридин бири бу һәқтә сөз қилип: “биз хитайға мәбләғ селиш арқилиқ ши җинпиң билән яхши шерикләрдин болуп қелишни арзу қилған идуқ. Әмма уларниң тутқан йоли бизни башқичә йолларни ойлинип көрүшкә мәҗбурлимақта,” дегән.

Хәвәрдә ейтилишичә, америка башчилиқидики “шималий атлантик әһди тәшкилати” ниң бу йеңи истратегийәлик пилани өз нөвитидә әза дөләтләрниң нөвәттики хитай хирислири һәққидә бәлгилик чүшәнчигә игә болушини истәйдикән. Әнглийә һөкүмити йеқинда русийәни “бивастә тәһдит” дәп атиған болса, хитайни “истратегийәлик хирис” дәп хуласә чиқарған икән. Шуниң билән биргә хитайдин келиватқан хирислар барғансери ешип меңиватқан реаллиқни көздә тутуп австралийә, йеңи зеландийә, японийә вә җәнубий корийә тунҗи қетим бу қетимқи NATO йиғиниға тәклип қилинған.

Хитай һөкүмити һәр даимқидәк бу йеңи йүзлинишни әйибләп инкас қайтурған һәмдә “америка җаһангирлики мушу арқилиқ бизниң тәрәққиятимизни боғмақчи, шундақла америка башчилиқидики йеңи зомигәрләргә сорун һазирлимақчи” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.