Нато (NATO) японийәдә иш биҗириш орни ачидикән

Шималий атлантик әһди тәшкилати (NATO) һинди-тенч окян райони билән болған алақисини күчәйтиш үчүн японийәдә иш беҗириш орнини ачидикән.

Японийәниң “никки асия” гезитиниң хәвәр қилишичә, шималий атлантик әһди тәшкилати токйода алақилишиш ишханиси ечиш арқилиқ японийә, җәнубий корийә, австралийә вә йеңи зеландийә қатарлиқ шериклири билән болған алақини күчәйтидикән. Бу нато вә униң шериклириниң хитай тинч окян районида пәйда қиливатқан тәһдит вә риқабәткә тақабил турушиға пурсәт яритидикән.

Шималий атлантик әһди тәшкилати японийә биләнму айрим һәмкарлиқини күчәйтидиған болуп, улар 11-июлдин 12-июлғичә литва пайтәхти вилнюста өткүзүлидиған шималий атлантик әһди тәшкилатиға әза дөләтләр башлиқлири йиғинидин илгири һәмкарлиқ программиси имзалашни көзлимәктикән. Нато вә японийә тәрәп тор тәһдитигә тақабил туруш, йеңидин гүллиниватқан вә қалаймиқанчилиқ пәйда қилиш иқтидариға игә техникиларда ортақ мәйдан һасил қилиш вә сахта учур һәрикитигә қарши туруш қатарлиқ саһәләрдиму пикир алмаштуридикән.

Натониң японийәдә ишхана ечиш пилани, японийә вә шималий атлантик әһди тәшкилатиниң әмәлдарлири тәрипидин дәлилләнгән.

Японийәдики данийә әлчиханиси натониң алақилишиш ноқтиси болуп, данийәниң японийидә турушлуқ баш әлчиси петер таксо-җенсен “никкей асия” ға қилған сөзидә, натониң японийәдә ишхана ечишиниң һинди-тинч окяндики тунҗи қетимлиқ иш болидиғанлиқи, әмма униң һәргизму симовл характерлиқ болмайдиғанлиқини тәкитлигән. У, “бу японийә билән шималий атлантик әһди тәшкилати оттурисидики мунасивәтни күчәйтишниң наһайити көрүнәрлик вә һәқиқий йоли болиду” дегән.

Кейо университетиниң дотсенти мичито “тисуроока” гезиткә қилған сөзидә украина урушиниң натониң хитайға болған көз қаришини өзгәрткәнликини әскәрткән. У, “хитай өзи пәйда қиливатқан хәвпни аз дәп, русийәниңму қоллиғучиси болуп оттуриға чиқти. Мана бу явропаниң бихәтәрлики билән биваситә мунасивәтлик” дегән.

Шималий атлантик әһди тәшкилатиниң баянатчиси оана лунгаску (Oana Lungescu) 3-май күни “никкей асия” гезитигә бәргән баянатида, “бизниң қиммәт қаришимиз, мәнпәәтимиз вә шундақла украинани қоллаш, мустәбит һакимийәтләр пәйда қиливатқан бихәтәрлик хирисини һәл қилишқа охшаш қайғулиримиз ортақ. Бизниң шериклик мунасивитимиз күнсери күчийиватиду” дегән.

Мәлум болушичә, шималий атлантик әһди тәшкилатиниң ню-йорктики б д т баш шитабида, явропадики хәвпсизлик вә һәмкарлиқ тәшкилатида, шундақла грузийә, украина, боснийә-гертсеговина, молдова вә кувәйттә алақилишиш ишханилири бар икән.