NATO Һәрикәт даирисиниң кеңийиши диққәт қозғимақта

Мухбииримиз әзиз
2022.07.14

“шималий атлантик окян әһди тәшкилати” (NATO) ниң йеқинқи мәзгилләрдә ечилған йиғинлириға мәзкур иттипаққа әза болмиған японийә, австралийә, йеңи зеландийә вә җәнубий корейә рәһбәрлириниң муқим қатнишип келиватқанлиқи нөвәттә уларниң асия районидики һәрикәт даириси билән бағлап чүшәндүрүлмәктикән.

Ройтерс агентлиқиниң 13-июлдики обзор мақалисидә көрситилишичә, асия районида барғансери юқири пәллигә чиқиватқан “хитай хириси” һәққидики әндишиләр буниңдики бир муһим сәвәб икән. Буниң билән америка қошма штатлири (а қ ш) вә униң һәмкарлашқучилири оттурисидики мунасивәт техиму қоюқлишип, хитай хирисиға бирликтә тақабил туруштәк йеңи йүзлиниш оттуриға чиқишқа башлиған.

 Америка ташқи ишлар министирлиқиниң алий мәслиһәтчилиридин дерек шоллет (Derek Chollet) бу мәсилә һәққидә ройтерс агентлиқиниң зияритини қобул қилғанда: “мениңчә өткән он йилда барлиққа кәлгән әң чоң өзгириш бизниң илгирики шериклиримиз билән болған мунасивитимизниң қоюқлишишиға әгишип һинди-тинч окян районидики шериклиримиз билән болған алақимизниңму күчәйгәнликидә ипадилиниду. Бизниң хитай билән қандақ муамилидә болушимизниң асаси пиринсипи һәмкарлашқучилиримиз билән бирликтә иш көрүш шәклидә вуҗудқа кәлмәктә” дегән. Дәрвәқә җәнубий корейә президенти юн сукйол (Yoon Suk-yeol) мадридтики NATO йиғиниға қатнишип өзлириниң шималий корейәдин келиватқан ядро тәһдити алдида техиму зор дуняви рол елиш арзусида болуватқанлиқини намаян қилған.

Нөвәттә уларниң кәлгүсидики һәмкарлиқиниң һәрбий ишлар вә сәһийә саһәсидә қанат йейиши тәхмин қилинмақтикән. Буниңға мас һалда америка һәрбий қисимлириниң һинди-тинч окян районидики паалийәтлириму охшимиған шәкилләрдә күчәймәктә. 13-Июлда америка деңиз армийәсиниң “роналд реган” (Ronald Reagan) намлиқ авиаматка һуҗумчилар гурупписи җәнубий хитай деңизида бихәтәрлик мәшғулати қилған. Бу гуруппиниң қомандани фред голдхәммер (Fred Goldhammer) бу һәқтә сөз қилип :“бизниң бу җайға келишимиз һинди-тинч окян райониниң очуқ вә әркин болушиға төһпә қошуш үчүндур” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.