NATO Heriket da'irisining kéngiyishi diqqet qozghimaqta

Muxbi'irimiz eziz
2022.07.14
Share on WhatsApp
Share on WhatsApp

“Shimaliy atlantik okyan ehdi teshkilati” (NATO) ning yéqinqi mezgillerde échilghan yighinlirigha mezkur ittipaqqa eza bolmighan yaponiye, awstraliye, yéngi zélandiye we jenubiy koréye rehberlirining muqim qatniship kéliwatqanliqi nöwette ularning asiya rayonidiki heriket da'irisi bilen baghlap chüshendürülmektiken.

Roytérs agéntliqining 13-iyuldiki obzor maqaliside körsitilishiche, asiya rayonida barghanséri yuqiri pellige chiqiwatqan “Xitay xirisi” heqqidiki endishiler buningdiki bir muhim seweb iken. Buning bilen amérika qoshma shtatliri (a q sh) we uning hemkarlashquchiliri otturisidiki munasiwet téximu qoyuqliship, xitay xirisigha birlikte taqabil turushtek yéngi yüzlinish otturigha chiqishqa bashlighan.

 Amérika tashqi ishlar ministirliqining aliy meslihetchiliridin dérék shollét (Derek Chollet) bu mesile heqqide roytérs agéntliqining ziyaritini qobul qilghanda: “Méningche ötken on yilda barliqqa kelgen eng chong özgirish bizning ilgiriki shériklirimiz bilen bolghan munasiwitimizning qoyuqlishishigha egiship hindi-tinch okyan rayonidiki shériklirimiz bilen bolghan alaqimizningmu kücheygenlikide ipadilinidu. Bizning xitay bilen qandaq mu'amilide bolushimizning asasi pirinsipi hemkarlashquchilirimiz bilen birlikte ish körüsh sheklide wujudqa kelmekte” dégen. Derweqe jenubiy koréye prézidénti yun sukyol (Yoon Suk-yeol) madridtiki NATO yighinigha qatniship özlirining shimaliy koréyedin kéliwatqan yadro tehditi aldida téximu zor dunyawi rol élish arzusida boluwatqanliqini namayan qilghan.

Nöwette ularning kelgüsidiki hemkarliqining herbiy ishlar we sehiye saheside qanat yéyishi texmin qilinmaqtiken. Buninggha mas halda amérika herbiy qisimlirining hindi-tinch okyan rayonidiki pa'aliyetlirimu oxshimighan shekillerde kücheymekte. 13-Iyulda amérika déngiz armiyesining “Ronald régan” (Ronald Reagan) namliq awi'amatka hujumchilar guruppisi jenubiy xitay déngizida bixeterlik meshghulati qilghan. Bu guruppining qomandani fréd goldxemmér (Fred Goldhammer) bu heqte söz qilip :“Bizning bu jaygha kélishimiz hindi-tinch okyan rayonining ochuq we erkin bolushigha töhpe qoshush üchündur” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.