NATO Ниң нишани хитайға йөткилишкә башлиди

Мухбиримиз әзиз
2020-06-10
Share

Һазир аллиқачан дуняви вабаға айлинип кәткән вә америка президенти доналд трамп “хитай вируси” дәп атиған таҗсиман вируси дуняниң хитай һәққидики чүшәнчилиридә қаттиқ бир силкиниш пәйда қилғанлиқи мәлум.

“малийә вақти” журнилиниң 8-июндики хәвиридә ейтилишичә, нөвәттә шималий атлантик әһди тәшкилати (NATO) һәрқайси әза дөләтләрни хитайға қарши һәрбий иттипаққа қатнишишқа дәвәт қилишқа башлиған. Тәшкилат рәиси, норвегийәниң сабиқ баш министири җенс столтенберг америкада ечилған муһакимә йиғинида бу сөзни қилған һәмдә хитайниң иқтисадий вә техника җәһәттики тәрәққиятини дәсмайә қилип әркинлик алимигә вә шәхсләргә ғайәт зор тәһдит пәйда қиливатқанлиқини тәкитлигән. Хәвәрдә хитайниң тор дуняси, шималий муз окян вә африқада өз тәсирини зорайтишқа урунуватқанлиқи әскәртилип: “биз бейҗиңни NATO үчүн йеңи дүшмән әмәс, дәп келиватимиз. Әмма бизниң иттипақдашлиримиз хитайниң баш көтүрүшиниң немидин дерәк беридиғанлиқини муһакимә қилишқа тунҗи қетим бирдәк қошулди,” дегән.

“явро-асия вақти” гезитиниң 8-июндики хәвиридә ейтилишичә, нөвәттә әнглийә һөкүмити хитай билән болған мунасивәтни қандақ йосунда давамлаштуруш һәққидә бу қетимқи вабадин кейин рәсмий қарар алидиғанлиқини җакарлиған. Столтенберг мушу әһвалларни бирләштүргән һалда: “биз австралийә, йеңи зеландийә вә японийә билән зич һәмкарлишип хитайниң башқиларни бозәк қилишқа урунуши вә тар йәргә қистишиға қарши турушимиз лазим,” дегән.

Хәвәрдә ейтилишичә, нөвәттә һәрбий қуввәттә ғоллуқ һесаблинидиған америка яки русийә әмәс, әксичә һәрбий ишларға салған мәблиғи дуня бойичә иккинчи орунда туридиған хитай барғансери көплигән дөләтләр үчүн еғир тәһдит болуп қалмақта икән. Бу әһвалда уларниң хитайдин келиватқан түрлүк тәһдитләргә қарши иттипақ һасил қилиши барғансери көп саһәниң ортақ тәклипигә айлинип қалмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт