Natoning xitay tehditige qarshi bayanati xitayning oghisini qaynitiwetken

7-Ayning 12-küni, natoning yétekchilikide litwaniyede ötküzülgen dölet bashliqliri yighinida, xitaygha qarshi küchlük bayanat élan qilin'ghan bolup, xitayning qattiq ghezipini qozghighan.

Bu heqte “Eljezire” torining 12-iyul küni bergen xewiride éytilishiche, nato bash katipi, général jéns stolténbérg (Jens Stoltenberg) teshkilligen bu yighin'gha qatnashqan awstraliye, yaponiye, yéngi zélandiye we koriye rehberliri natoning hindi-tinch okyan rayoni xewpsizlikini qoghdash sépige qétilidighanliqini bildürgen bolup, ular élan qilghan birleshme bayanat emeliyette xitay tehditige qarshi bérilgen bayanat iken.

Bayanatta mundaq déyilgen: “Xitay xelq jumhuriyiti siyasiy, iqtisadiy we herbiy wasitilerni qollinip dunyagha kéngeymichilik qilmaqta, yene kélip ularning bu istratégiyesi, gherizi we herbiy qurulushi mutleq mexpiy. Ular yene yaman gherezlik tor hujumi qozghap, qarshi pikirdikilerni basturup, saxta uchurlarni tarqitip, ittipaqdashlirimizning xewpsizlikige ziyan salmaqta” .

Bayanatta yene, xitayning rusiye bilen istratégiyelik hemkarliqini dawamliq kücheytiwatqanliqi, ikkisining birliship xelq'ara tertipni buzushqa urunuwatqanliqi, asiya-tinch okyan rayonining nato üchün muhim rayon ikenliki, bu yerdiki özgirishning yawropa we atlantik okyan rayonining xewpsizlikige biwasite tesir körsitidighanliqi otturigha qoyulghan.

Xitay bu bayanatni eyiblep, “Xitay hökümiti natoning asiyagha kéngeymichilik qilishigha qarshi turidu” dégen hemde “Kimki xitayning qanuniy hoquq-menpe'etige ziyan yetküzidiken xitay uninggha qarap turmaydu” dep tehdit salghan. Xitayning “Yer shari waqit géziti” obzor élan qilip, “Nato dégen bu teshkilat amérikaning qoral-neyzisi, dunyadiki barche urushning menbesi” dep eyibligen.