NATO Yawropani yene bir qétim xitay heqqide agahlandurdi

“Shimaliy atlantik ehde teshkilati” (NATO) ning bash katipi jins stolténbérg (Jens Stoltenberg) 18-féwral küni gérmaniyening myunxén shehiride ötküzülgen dunya xewpsizlik mejlisige uchur yollap “Yawropaning uyqusini achidighan waqti keldi. Biz emdi xitayning xirislirigha yüzlinishimiz lazim” dégen.

“Siyasiyon” gézitining 18-féwraldiki xewiride éytilishiche, bash katip jins stolténbérg bu qétim ewetken uchurida éniq qilip “Yawropada bügün boluwatqan ishlar ete asiyada yüz bérishi mumkin” dégen. Bolupmu rusiyening ukra'inagha tajawuz qilishidin kéyin xitay pa'al türde rusiyeni herbiy we iqtisadiy jehettin qollap kéliwatqan bolup, bu hal ularning teywen'ge hujum qilish arqiliq yéngi bir urush meydani peyda qilish niyitini ashkarilighan.

Bash katip jins stolténbérg özining uchurida gherb dunyasidiki herqaysi ittipaqdash döletlerni xitay bilen bolidighan türlük iqtisadiy pa'aliyetlerdin néri turushqa dewet qilipla qalmastin gherb ellirini iqtisadiy we herbiy mesililerde jezmen birdek herikette bolushqa chaqirghan. U bu heqte qilghan sözide “Ukra'inadiki weziyet hakimmutleq tüzümning qandaq balayi'apetlerni élip kélidighanliqini éniq körsetti. Emdi bu xil xataliqning xitayning qolida yene bir qétim yüz bérishini cheklishimiz lazim” dégen.

Amérika tashqi ishlar ministirliqining tor bétidiki melumatlarda éytilishiche, bu qétimqi dunya xewpsizlik mejlisige qatnashqan amérika tashqi ishlar ministiri antoni bilinkén ependi xitay kompartiyesi merkiziy tashqi ishlar komitétining mudiri wang yi bilen söhbetleshken. Herqaysi axbarat wasitiliri “Keskin ibariler bilen tolghan uchrishish” dep teswirligen bu qétimqi söhbette bilinkén ependi “Amérika hökümiti igilik hoquqimizgha, jümlidin hawa boshluqimizgha dexl-teruz qilish mezmunidiki héchqandaq heriketni qobul qilalmaydu. Bu xil mes'uliyetsiz ishlar bundin kéyin qet'iy yüz bermesliki lazim. Rusiyening tajawuzchiliq urushida eger xitay hökümiti maddiy eshya ‍arqiliq yardem berse buning aqiwitige özliri jawabkar bolidu” dep körsetken.