"NBA" Uyghur élidiki meshiq baziliri bilen alaqisini üzgen

Muxbirimiz irade
2020-07-23
Élxet
Pikir
Share
Print

Amérikaning waskétbol uyushmisi "NBA" Uyghur élidiki meshiq bazisi bilen alaqisini üzgenlikini jakarlidi.

"NBA" uzundin béri éghir kishilik hoquq krizisi yüz bériwatqan we 3 milyon etrapida kishi lagérgha qamalghan Uyghur rayonida meshiq bazisi achqanliqi we bu zulumgha süküt qilghanliqi seweblik amérikaliq siyasetchiler we shundaqla kishilik hoquq aktiplirining küchlük tenqidige uchrap kéliwatatti.

"CBS" téléwiziyesining xewiridin qarighanda, amérika kéngesh palata ezasi marsha blekbérn amérika waskétbol uyushmisini tenqid qilip, ulardin néme üchün Uyghur élidiki munasiwetlirini üzmeydighanliqini sorighan.

Netijide, waskétbol uyushmisi "NBA" ning mu'awin komissari mark tatum 21-iyul küni kéngesh palata ezasi blekbérin'gha jawab xéti yazghan. Tatum xétide "NBA Shinjangdiki waskétbol akadémiyesi bilen bir yildin artuq waqittin béri héchqandaq alaqe qilmidi. Bizning munasiwitimizge xatime bérildi" dep yazghan.

Mezkur jawab xétini kéngesh palata ezasi marsha blekbérn özining tiwittirdiki hésabida élan qilghan.

Amérika döletlik waskétbol kulubi "NBA" ning ürümchidiki meshiq merkizi 2016‏-yili 10‏-ayda qurulghan bolup, u xitaydiki 3 meshiq merkizining biri bolup hésablinidiken. Yuqiridiki bu meshiq merkizi qurulghandin buyan izchil halda közetküchilerning tenqid obyékti bolup kelgen. Kishilik hoquq pa'aliyetchiliri "NBA" ning bu herikitini xitay hökümitining Uyghur élidiki zulum siyasetlirini aqlighanliq, dep bahalighan.

Amérika dölet mejlisining 8 neper ezasi ötken yili öktebirde ulargha mexsus mektup ewetip, amérika waskétbol uyushmisini ürümchidiki meshiq merkizini taqashqa dewet qilghan idi.

Toluq bet