“Xitaydiki eng chongqur néfit quduqi” tarim oymanliqida kolandi

Xitay hökümiti nechche on yillap Uyghur diyaridin néfit qéziwatqan bolup, yéqinda chongqurluqi sekkiz ming métirdin ashidighan néfit quduqliri tarim néfitlikidin qézilishqa bashlighan.

Xitay bashqurishidiki “Tengritagh tori” ning 9-yanwardiki xewiride éytilishiche, bu xil quduqlarning köpinchisi sekkiz kilométirdin ashidighan bolup, xitay temin etken néfit burghilash xeritisidiki san-sanaqsiz chékitler bu xil quduqlarning nöwette köplep qéziliwatqanliqini körsetken. Bu xil quduqlardin eng yéngiliri 9325 métir chongqurluqta kolinish pilan qilin'ghan bolup, nöwette jiddi qézilishqa bashlighan. Shu sewebtin xitaylar bu quduqqa “Xitaydiki eng chongqur kolan'ghan nuqta” dep nam qoyuwalghan. Nöwette bu quduqlarning chongqurluqi “Dunyadiki eng igiz choqqa” dep atiliwatqan chomulungma (xitayche “Jumulangma” ) choqqisining omumiy égizlikidinmu éship chüshkenliki xitay axbaratliridin köplep yer alghan.

“Xitayning eng chong énérgiye ambiri” dep atiliwatqan Uyghur diyari yillardin buyan xitay iqtisadining jan tomuri bolghan néfit, tebi'iy gaz, kömür qatarliqlar bilen teminlep kéliwatqan bolup, Uyghurlarning namratliq ichidiki turmushi izchil buninggha roshen sélishturma bolup kéliwatqanliqi melum. Yéqinqi mezgillerde bu xil zor kölemdiki énérgiye qézish peyda qiliwatqan köpligen ikkilemchi amillar, jümlidin su bayliqining xorap kétishi, muhitning éghir bulghinishi qatarliqlar her sahening jiddiy diqqitini qozghap kelmekte.