Amérika dölet mejliside nilson mandilaning 95 yashqa kirgenliki tebriklendi

Amérika dölet mejlisi nobél tinchliq mukapati sahibi, erkinlik jengchisi nilson mandilaning 95 yashqa kirgenlikini tebriklidi.

Mejlistiki murasimgha qatnashqan mejlis ezaliri we bir qisim kishilik hoquq teshkilatlirining wekilliri nilsun mandilaning jenubiy afriqidiki irqiy kemsitishni yoqitish yolida qilghan ish-pa'aliyetliri, uning jasariti shundaqla uning prézidént waqtidiki diplomatiyisige yuqiri baha bérip uni “Jesur kishilik hoquq küreshchisi, heqiqiy bir siyasetchi” dep teriplidi.

Jenubiy afriqining amérikida turushluq bash elchisi abraham lasmor mejliste söz qilip “Shübhisizki, nilsun mandila herikiti arqiliq pütün dunyadiki diktatorlargha bash egmey küresh qiliwatqan xelqlerge öchmes miras qaldurdi” dédi.

Nilsun mandila jenubiy afriqidiki qara tenliklerning hoquqini qolgha keltürüsh yolida hayatining 27 yilini türmide ötküzgen, nurghun qéyin-qistaqlargha uchrighan. Emma u qilchimu boshashmay bu yolda küresh qilghan. U 1990-yili xelq'araning bésimi bilen türmidin qoyup bérilgendin kéyin, 1994-yili saylam bilen jenubiy afriqining prézidénti bolghan. 1993-Yili nobél tinchliq mukapatigha érishken. Uning “Erkinlik yoli hergizmu tüz bolmaydu”, “Dunya azadliqini qolgha keltürüsh xitabnamisi”, “Erkinlikke sozulghan uzaq yol” qatarliq eserliri bar.