Норвегийә ширкәтлири мәҗбурий әмгәккә четишлиқ хитай ширкәтлиригә ғайәт зор мәбләғ салған

Йеқинда норвегийәниң йеңилинидиған енергийә саһәсидики хизмәтчилириниң ғайәт зор соммилиқ банка аманәт пуллирини өзлириму билмигән һалда мәҗбурий әмгәк билән четишлиқ хитай ширкәтлиригә пай мәблиғи қилип салғанлиқи мәлум болған.

“норвегийә радийо-телевизийә ширкити” ниң 26-авғусттики тәкшүрүш доклатида көрситилишичә, норвегийәдики “форинбар енергийә ширкити” өз хизмәтчилириниң 370 милйон норвегийә крони (тәхминән 43 милйон америка доллириға йеқин) банка аманәт пулини уйғур дияридики үч чоң енергийә ширкитигә пай мәблиғи қилип салған. Булар “шинҗаң алтун шамал енергийә ширкити”, “җинко қуяш енергийә ширкити” вә “дачуән йеңи енергийә ширкити” икән.

Хәвәрдә ейтилишичә, бу һәқтики тәкшүрүш доклатлири бу үч ширкәтниң бирдәк лагерларға қамалған уйғурларни мәлум мәзгиллик тутқунлуқ һаятидин кейин “ишқа орунлаштуруш” намида мәҗбурий әмгәккә селиватқанлиқини дәлилләп чиққан. Бу енергийә ширкәтлириниң пай чәклири хәлқара пай чеки базириға селинған болуп, норвегийә йеңилинидиған енергийә саһәси өз хизмәтчилириниң қәрәллик банка аманәт пуллирини “йешил енергийә” дәп аталған бу ширкәтләрниң енергийә ишлириға пай қилип салған.

Бу һәқтики әһваллар ашкара болғандин кейин, форенбар енергийә ширкити баянат елан қилип: “ширкитимизниң мәҗбурий әмгәккә четишлиқ бу ширкәтләрниң пай чекини сетивелиши пүтүнләй бу һәқтики әһваллардин хәвәрсиз болғанлиқтин келип чиққан. Биз нөвәттә бу һәқтики әһвалларни тәпсилий қарап чиқип бу һәқтә башқичә қарар алмақчимиз,” дегән.