Язғучи нурмуһәммәд тохтиниң вапати чәтәл ахбаратлиридиму зор диққәт қозғиди

Мухбиримиз әзиз
2019-06-25
Елхәт
Пикир
Share
Принт

Һазирқи заман уйғур әдәбиятидики үлгилик язғучилардин нурмуһәммәд тохтиниң бу йил март ейида лагердин чиқип бирнәччә ай өтмәйла сирлиқ һалда өлүп кетиши чәтәл ахбарат васитилиридиму көпләп хәвәр қилинди. Канададики әң чоң хәвәр агентлиқиниң бири болған «канада радийо ширкити» ниң бу һәқтики мәхсус зиярәт хатирисидин кейин «йәр шари вә почта» гезити 24-июн күни бу һәқтә тәпсилий хәвәр ишлиди.

Бу хәвәрләрдә хитай һөкүмити изчил «әсәбийлик вә террорлуқ идийәлири билән юқумланған кишиләрни һәқсиз давалайдиған мәктәп» дәп тәшвиқ қиливатқан, шундақла милйонлап уйғурни қамивалған лагерларниң қандақ җай икәнлики йәнә бир қетим әскәртилди. Болупму еғир кесәлгә гириптар болған, йеши 70 кә барған, «әсәбийлик» яки «террорлуқ» билән һечқандақ алақиси болмиған бир мойсипитни «тирик елип кетип, өлүкини чиқирип бәргән» қабаһәтлик һадисидин һазир уйғур җәмийитини еғир вәһимигә селиватқан лагерлардики паҗиәләрниң бир бурҗикини көрүвелиш мумкин икәнлики көрситилди.

Бу хәвәр вә мақалиләрдә алаһидә әскәртилгән йәнә бир нуқта нурмуһәммәд тохтиға охшаш уйғурларниң чоңқур һөрмитигә еришкән бир язғучиниң нишанлиқ һуҗум обйекти болушида уйғурларниң авазини пүтүнләй өчүрүветиш урунушиниңму муһим орун тутидиғанлиқи болған. Шундақла нурмуһәммәд тохтиниң бир қисим надир әсәрлириниң уйғур оқурмәнлири ичидә зор тәсир қозғиғанлиқи әсләп өтүлгән.

Ғәрб оқурмәнлиригә уйғурларниң һазир қандақ бир шараитта мәвҗут болуватқанлиқини тәсвирләп бериш үчүн бу әсәрләрдә мейит игилириниң дәпнә мурасими үчүн юртиға бериш имканиға игә әмәслики, мушундақ бир өлүм хәвириниң ай-айлап бесилип қелиши, һәтта җан үзгән кишиниң қачан вә қәйәрдә өлүп кәткәнликини сораш имканийитиниңму йоқлуқи қатарлиқ тәпсилатлар берилгән.

Пикирләр (0)
Share
Толуқ бәт