Nyu-york waqti géziti: “Shinjangda ishlepchiqirishning eslige kelgenliki ilgiri sürülsimu, lékin bezi so'allar jawabsiz qaldi”
2020.03.30
“Nyu-york waqti géziti” 30-mart küni Uyghurlar heqqide xewer bérip, “Shinjangda ishlepchiqirishning eslige kelgenliki ilgiri sürülsimu, bezi so'allarning jawabsiz qalghanliqi” ni bildürdi. Mezkur gézitning muxbiri a'usten remzining xewer qilishiche, bu rayondiki lagérlarda yétiwatqan musulmanlar heqqide héchqandaq xewer yoq iken.
Xewerde, rayondiki qamal nurghun kishining ach qélishini keltürüp chiqardi, dégen endishini peyda qilghanliqi ilgiri sürülgen.
Xewerde qeyt qilinishiche, xitayning “Xelq géziti” 12-mart küni “Shinjangda ishlepchiqirish we turmush pütünley normalgha qaytti” dep élan qilghan bolsimu, lékin bu rayondiki yuqumning “Éghirliq ehwali shundaqla rayondiki omumyüzlük qamal bezi puqralarning hayat qélishini qanchilik qiyinlashturghanliqigha da'ir so'allar jawabsiz qalmaqta” iken.
Xewerde, shinjang hökümiti rayonda 76 yuqumdar bayqalghanliqi, ularning 3 nepirining ölgenlikini ilgiri sürsimu, lékin chet'eldiki Uyghurlarning lagérdiki bir milyondin artuq Uyghur, qazaq we bashqa musulmanlarning teqdiridin endishe qiliwatqanliqi, ularning xitay hökümiti élan qilghan yuqum toghrisidiki sanliq melumatlargha guman bilen qaraydighanliqi tekitlen'gen. Xewerde yene, nöwette xitay da'irilirining Uyghur emgek küchlirini mezkur rayonning ichi we sirtigha keng kölemlik yötkewatqanliqi, mutexessislerning qattiq kontrol we mejburiy yötkeshtek bu xil usulni mejburiy emgekke yatidu, körsitiwatqanliqini bildürülgen.