Obama türkiyening térrorizmgha qarshi özini qoghdash hoquqini qollaydighanliqini bildürgen

Türkiye prézidénti ishxanisi jüme küni bayan élan qilip, amérika prézidénti obamaning türkiyening süriyege alaqidar xewpsizlik endishilirini chüshinidighanliqini we uni qollaydighanliqini bildürgenliki ashkarilidi.

Türkiyedin chiqidighan “Saba kündilik géziti” ning xewer qilishiche, obama charshenbe küni türkiye paytexti enqerede 28 ademning jénigha zamin bolghan térror hujumidin kéyin hal sorash üchün erdughan'gha téléfon qilghan. Ular téléfonda 1 sa'et 20 minut sözleshken.

Obama süriye chégrasi ichidiki kurd PYD siyasiy partiyesi we YPG qoralliq küchlirining heriketlirige yéqindin diqqet qilip turuwatqanliqi we türkiyening térrorizmgha qarshi özini qoghdash hoquqini qollaydighanliqini bildürgen.

Aqsarayning bu heqtiki bayanatigha qarighanda, obama süriye kurdlirining yéqinda qolgha keltürgen ghelibilirini suyi'istémal qilip yenimu keng zémin igilesh qestide bolmasliqini alahide tekitligen. U türkiyenimu özini tutuwélishqa chaqirghan.

Türkiye térrorluq hujumigha uchrighandin kéyin, rejep tayyp erdughan amérikigha xitab qilip, ularning süriye ichidiki kurdlarni qollashnitoxtimighanliqini eyibligen.

Türkiye süriye ichidiki YPG kurd qoralliq küchlirining türkiye ichidiki térrorchi teshkilat PKK ning bir qismi ikenlikni ilgiri sürüp, amérikini ularnimu “Térrorchi teshkilat” dep tonushqa chaqirip kelgen bolsimu, emma amérika YPG ni islam dölitige qarshi urushta kéreklik, dep qarap ularni qollashni toxtatmighan idi.

Bu sewebtin türkiye - amérika arisidiki pikri ixtilapi kücheygen.