Olaf sholiz xitaydin Uyghurlargha qaritiwatqan insaniyetke qarshi jinayitini toxtitishni telep qilishqa chaqirildi

Washin'gtondin muxbirimiz irade teyyarlidi
2024.04.16

Kishilik hoquqni közitish teshkilati gérmaniye bash ministiri olaf sholizni xitaydiki ziyariti mezgilide Uyghurlar mesilisini otturigha qoyushqa chaqirghan.

Kishilik hoquqni közitish teshkilati xitayda resmiy ziyarette boluwatqan gérmaniye bash ministiri olaf sholizdin, xitay hökümitini Uyghurlar we bashqa türkiy milletlerge qaratqan insaniyetke qarshi jinayitini ayaghlashturushqa chaqirishni telep qilghan.

Kishilik hoquqni közitish teshkilati 12- ayril küni élan qilghan ochuq xétide mundaq dégen:

“Olaf sholiz bu qétimliq ziyaritide xitay eger éghir kishilik hoquq mesililirini hel qilmisa, buning ikki dölet munasiwitige ziyan yetküzidighanliqini éniq otturigha qoyushi kérek. Jümlidin u, xitayning shinjangdiki Uyghurlar we bashqa türkiy xelqlerni nishan qilghan insaniyetke qarshi turush jinayitini axirlashturushini, tonulghan Uyghur alimi, étnografiye piroféssori rahile dawut we saxarof mukapati sahibi ilham toxti qatarliq xalighanche qolgha élin'ghan we türmige tashlan'ghan yüz minglighan Uyghurlarni erkinlikke chiqirishini telep qilishi kérek.”

Xewerlerdin qarighanda, gérmaniye bash ministiri sholizning xitay ziyariti 13-aprél xitayning chungching shehiridin bashlan'ghan bolup, u shangxey we béyjingda ziyarette bolghandin kéyin, 16- aprél küni xitay re'isi shi jinping we bash ministir li chyang bilen körüshidiken.

Sholiz eng axirqi qétim 2022-yili 11-ayda béyjingni ziyaret qilghan bolup, eyni waqitta u bir chong soda wekiller ömikini xitaygha bille élip barghan idi.

Kishilik hoquqni közitish teshkilatining gérmaniye diréktori wénzél michalski bayanattiki sözide: “Bash ministir sholizning gérmaniyening tar soda menpe'etini depla, kishilik hoquq mesilisini arqa pilan'gha ittermesliki, kishilik hoquq mesilisini muhim orun'gha qoyush gérmaniyening uzun muddetlik menpe'eti üchün paydiliq”, dep körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.