Amérika kéngesh palata ezaliri 2022-yilliq qishliq olimpék musabiqisini xitayda ötküzmeslik qarari sun'ghan

“Yaxu” torining yéqinda bergen xewiride bildürülüshiche, amérika kéngesh palata ezaliridin rik skot we bashqa 6 neper kéngesh palata ezasi xelq'ara olimpék komitétigha qarar sunup, 2022-yilliq qishliq olimpék musabiqisini xitaydin chékindürüp, kishilik hoquqni tonuydighan we uninggha hörmet qilidighan bashqa döletning bu musabiqini ötküzüshige yol échip bérishke chaqiriq qilghan.

Rik sikot öz bayanatida mundaq dégen: “Xitay hazir shinjangdiki Uyghurlargha irqiy qirghinchiliq yürgüzüwatidu؛ xongkongluqlarning hoquqini cheklewatidu, teywen'ge tehdit séliwatidu. Kommunist xitayning bir yaqtin lagérlarni dawamliq ishqa sélip insanliq hoquqini depsende qilishigha, yene bir yaqtin 2022-yil qishliq olimpék musabiqisi ötküzüshige yol qoyulmasliqi kérek”.

Xitayning Uyghur rayonidiki chektin ashqan zorawanliqi, xongkongluqlarni basturushi qatarliq mesililer xelq'araning izchil diqqitini qozghap kelgen bolup, 180 kishilik hoquq teshkilati birleshme mektub imzalap, dunyaning her qaysi jayliridiki dölet rehberlirini béyjing qishliq olimpék musabiqisini bayqut qilishqa chaqirghanidi.

Xewerde éytilishiche, 2022-yilliq qishliq olimpék musabiqisi kéler yili 2-ayning 4-küni bashlinidiken. Xitay 2015-yil bu musabiqini ötküzüsh hoquqini qolgha keltürgendin buyan buninggha izchil teyyarliq qilip kéliwatqan bolup, xelq'aradin kéliwatqan bésim we bayqut qilish sadalirigha qarshi diplomatiye we teshwiqat wasitilirini ishqa salmaqta iken.