Aqsarayning béyjing qishliq olimpikini bayqut qilishni oylishiwatqanliqi ilgiri sürüldi

Uyghur irqiy qirghinchiliqigha qarshi bésimning küchiyishige egiship, aqsarayning 2022-yilliq béyjing qishliq olimpik musabiqisini bayqut qilishni oylishiwatqanliqi ilgiri sürüldi. “Washin'gton közetküchisi” gézitining 28-féwral xewer qilishiche, aqsaray xitayning Uyghurlargha tutqan mu'amilisi tüpeyli béyjing qishliq olimpik musabiqisini bayqut qilish yaki bashqa döletke yötkesh toghrisidiki küchlük bésim astida musabiqige tutqan pozitsiyesini qayta oylishiwatqanliqining signali bergen.

Aqsarayning bayanatchisi jin saki ötken hepte aqsarayning béyjing qishliq olimpik musabiqisige qatnishish-qatnashmasliq mesiliside téxi axirqi qararni chiqarmighanliqi, biraq amérika olimpik komitétining pikirini alidighanliqini bildürgen. Jin saki burunqi sözliride bu mesilining téxi muzakire qilinmighanliqini bildürgen idi. Amérika taratqulirining bu heqtiki xewerliride, jin sakining ötken peyshenbe küni qilghan sözi bu mesilining muzakire qiliniwatqanliqi we buning bir burulush ikenlikini körsitidighanliqi tekitlen'gen.

Amérikaning b d t da turushluq sabiq elchisi nikiy xiléy ötken hepte maqale élan qilip, amérikani béyjing qishliq olimpikini bayqut qilishqa chaqirghan. U: “Eger amérika we bashqa erkin döletler béyjing qishliq olimpikigha qatnashsa, xitay kompartiyesi buni xitayning yershari orni we rehberlikining ispati, dep hésablaydu” dégen. U yene tiwéttirghimu uchur yollap, “Amérikining öz xelqige irqiy qirghinchiliq yürgüzgen, dunyagha tehdit séliwatqan bir döletni ulughlashturmasliqi” ni tekitligenidi.