Xelq'ara olimpik komitétining xitaygha yan bésishi zor ghulghula qozghidi

“Döletlik ammiwi radiyo” (NPR)ning 24-iyuldiki xewiride éytilishiche, xelq'ara olimpik komitéti shu küni amérika terep otturigha qoyghan “Xitay tenheriketchilirining olimpik musabiqiside rohlandurush dorisi ishlitish qilmishini tekshürüsh” heqqidiki telepni ret qilghan. Shuningdek, amérika iltimas qilghan “Salt léyk” (tuzluq köl) shehirining 2034-yilliq qishliq olimpik musabiqisige sahibxaniliq qilish iltimasi” ni bikar qilidighanliqini pesh qilghan.

Xewerde éytilishiche, 2021-yili tokyoda ötküzülgen yazliq olimpik musabiqiside xitay su üzüsh komandisidiki 23 neper mahirning musabiqidin ilgiri rohlandurush dorisi yewalghanliqi melum bolghan. Ashu tenheriketchilerdin 11 nepirining 26-iyul parizhda bashlinidighan olimpik musabiqisige qatnishishi melum bolghandin kéyin, amérika dölet mejlisi, amérika edliye ministirliqi qatarliqlar “Xelq'ara rohlandurush dorisigha qarshi turush komitéti” arqiliq bu qilmishni tekshürüshni keskin telep qilghan. Emma xelq'ara olimpik komitéti buni “Ademning béshini aghritidighan hemde zadila qobul qilishqa bolmaydighan telep” dégen.

Emma “Amérika rohlandurush dorisigha qarshi turush idarisi” ning bashliqi trawis tiygart (Travis Tygart) buni tenqidlep: “Xelq'ara olimpik komitétining xitay tenheriketchilirige baghlinishliq mushundaq bir yolluq telepke jawab bérishni ret qilishi hemde buni ‛salt léyk‚ shehirining iltimasigha chétip tehdit sélishi ademni yirgendüridu” dégen.

Melum bolushiche, shu waqitta “Xelq'ara rohlandurush dorisigha qarshi turush komitéti” xitay tenheriketchilerning dora yéyishi heqqidiki tekshürüsh netijisini jama'ettin mexpiy tutqan bolsimu, 2024-yili etiyazda muxbirlar buni pash qiliwetken. Emma shuningdin kéyin ular “Eyni waqitta xitay tenheriketchiler rohlandurush dorisi yémigen؛ musbet xaraktérlik tekshürüsh netijisi peqet tasadipiy bulghinishtin kélip chiqqan” dep turuwalghan. Nöwette bu hal xitay hökümitining xelq'ara jem'iyetni monopol qilish urunushlirining yene bir misali, dep qaralmaqta.