ئەنگلىيە تاشقى ئىشلار مىنىستىرى بېيجىڭ قىشلىق ئولىمپىك مۇسابىقىسىگە بارماسلىقى مۇمكىنلىكىنى بىلدۈرگەن

مۇخبىرىمىز ئەركىن
2021-07-30
Share

ئەنگلىيە تاشقى ئىشلار مىنىستىرى دومىنىك راب ئ‍ۆزىنىڭ 2022-يىللىق بېيجىڭ قىشلىق ئولىمپىك مۇسابىقىسىگە بارماسلىقى مۇمكىنلىكى، ئۇيغۇر ئېلى ۋەزىيىتى توغرىسىدا زور سەزگۈرلۈك بارلىقىنى بىلدۈرگەن. كۆزەتكۈچىلەرنىڭ ئېيتىشىچە، دومىنىك رابنىڭ سۆزى خەلقئارادا ئۇيغۇرلارغا «ئىرقىي قىرغىنچىلىق» قىلىش بىلەن ئەيىبلىنىۋاتقان خىتاينىڭ ساھىبخانىلىقىدىكى قىشلىق ئولىمپىكنى بايقۇت قىلىش چاقىرىقى كۈنسېرى كۈچىيىۋاتقان بىر ۋاقىتتا، باشقىلارغا يول ئېچىشى مۇمكىن بولغان بىر سىگنال ‍ئىكەن.

رويتېرس ئاگېنتلىقىنىڭ خەۋەر قىلىشىچە، دومىنىك راب 29-ئىيۇل ئەنگلىيە «Sky» (ئاسمان) تېلېۋىزىيەسىنىڭ بېيجىڭ قىشلىق ئولىمپىكىگە قاتنىشىدىغان-قاتناشمايدىغانلىقى ھەققىدىكى سوئالىغا «بۇنىڭ مۇمكىنچىلىكى گۇمانلىق» دەپ جاۋاب بەرگەن ھەم «مېنىڭچە بېرىشىم مۇمكىندەك قىلمايدۇ» دېگەن. بىراق ئۇ يەنە ئەنگلىيە تەنتەربىيەنى بەك سىياسىيلاشتۇرۇشنى خالىمايدىغانلىقى، تەنتەربىيە مۇسابىقىسىگە قاتنىشىشنى ‍ئەنگلىيەدىكى سىياسەتچىلەر قارار قىلماسلىقى كېرەكلىكىنى ئېيتقان.

ئۇ يەنە مۇنداق دېگەن: «ئەلۋەتتە، شىنجاڭغا ئالاقىدار ۋە شۇنىڭغا ئوخشاش مەسىلىلەردە زور سەزگۈرلۈك بار. بىزنىڭ سىياسىي-دىپلوماتىك جەھەتتىكى ۋەكىللىك دەرىجىمىزنى ۋاقتى كەلگەندە قارار قىلىمىز».

بۇنىڭ ئالدىدا ئامېرىكا دۆلەت مەجلىسىنىڭ پارتىيە ھالقىغان بىر گۇرۇپپا ئەزاسى خەلقئارا ئولىمپىك كومىتېتىنىڭ پرېزىدېنتىغا خەت يېزىپ، بېيجىڭ قىشلىق ئولىمپىكىنى كېچىكتۈرۈشنى، ئەگەر خىتاي ئۇيغۇرلارغا «ئىرقىي قىرغىنچىلىق» قىلىشنى توختاتمىسا، باشقا دۆلەتكە يۆتكەشنى تەلەپ قىلغان. لېكىن خەلقئارا ئولىمپىك كومىتېتى بۇ ھەپتىنىڭ باشلىرى رادىيومىزغا بەرگەن باياناتىدا، قىشلىق ئولىمپىكنى باشقا دۆلەتكە يۆتكەش «مۇمكىن ئەمەسلىكى» نى بىلدۈرگەن.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت