Béyjing olimpik musabiqisini bayqut qilish chuqanliri téximu yuquri pellige chiqti

Muxbirimiz eziz
2021-08-24
Share

Xitay hökümiti 2022-yili sahibxanliq qilmaqchi boluwatqan béyjing olimpik musabiqisini bayqut qilish chuqanliri izchil dawam qiliwatqan bolup, nöwette barghanséri yuquri pellige chiqmaqta. 23-Awghust küni birleshken döletler teshkilatining "Zapas bash katipi", b d t diki bash katip we mu'awin bash katiptin qalsila üchinchi orunda turidighan yuquri derijilik emeldar déywid krayn we ikki neper kishilik hoquq adwokati birliship élan qilghan obzor maqalisida bu mesile yene bir qétim alahide tekitlen'gen.

Obzorda ular alahide qilip xitay hökümitining Uyghurlargha irqiy qirghinchiliq yürgüziwatqanliqi, shuningdek ularning tibet we xongkong rayonidiki basturush herketlirini misal qilip: "Emdi kishilik hoquq teshkilatliri we herqaysi hökümetlerning béyjing olimpik musabiqisini bayqut qilishining exlaqiy we wijdaniy sinaq mezgili yétip keldi," dep körsetken. Shundaqla xitay hökümitining "Térorchilar" dep qariliwatqan talibanlar hakimiyiti bilen éghiz-burun yalishiwatqanliqi alahide eskertilgen.

Aptorlar xelq'ara olimpik komitéti 1936-yilidiki bérlin olimpik musabiqisini cheklimigen ré'alliqni misal qilish arqiliq shunche ashkara halda "Ariyanlar aliy irq" dégen nezeriyini bazargha séliwatqan hemde qirghinchiliqni bashlap bolghan natsistlar gérmaniyesining aqiwette milyonlighan yehudining béshigha chiqqanliqini, nöwette xitay hökümitiningmu xuddi mushu mezmundiki teshwiqatlarni ashkara qiliwatqanliqini, bularning hemmisi ‍olimpik rohining mezmunliridin bolghan "Barche xelqni bir meydan'gha jem qilish" dégen maddigha éghir xilap ikenlikini sherhilep bergen. Aptorlarning qarishiche, 2008-yilidiki béyjing yazliq olimpik musabiqisining özila xitay hökümitining Uyghurlar we bashqa xitay bolmighan milletlerge yürgüzgen zulumlirini étirap qilghanliq bolghan. Netijide xitay hökümitining bu xil zulumliri nahayiti tézla bügünkidek yuquri chekke yetken.

Ular axirida béyjing qishliq olimpik musabiqisini bashqa döletke yötkesh, herqaysi döletler bu qétimliq musabiqige wekil ewetmeslik qatarliq bir qatar tekliplerni otturigha qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet