Уйғур районида “дәрәх тикип орман бина қилиш” техиму көп хитай көчмәнлиригә муһит һазирлаш һәрикити болуп қалған

Вашингтондин мухбиримиз җәвлан тәйярлиди
2024.03.15

Уйғур районидики тәбиий байлиқларни көпләп қезип, екологийәлик муһитни еғир дәриҗидә бузғунчилиққа учратқан, иһатә орманни йоқ қилип боз йәр ечип, қум көчүшни еғирлаштурған хитай даирилири әмди уйғур районини техиму көп аһалә яшайдиған маканға айландуруш үчүн “көчәт тикип орман бина қилиш” сәпәрвәрликини башлиған.

“шинҗаң гезити” ниң 15-март күни чиқарған хәвиригә қариғанда, 3-айниң 12-күни хитайдики “көчәт тикип орман бина қилиш” күни мунасивити билән турпан, хотән қатарлиқ җайларда 500 миң мо көчәт тикилгән. Буниң үчүн җайлардин нурғун адәм күчи вә йәрлик кадирлар ишқа селинған.

Турпанда қурғақчилиқ, хотәндә болса қум көчүш еғир җайлар болуп, хитай даирилири ашлиқ ишләпчиқиришқа капаләтлик қилиш вә яшаш муһитини яхшилаш үчүн бу вилайәтләрдики етизларни иһатә орман билән қоғдаш, дәря-өстәңләрни ремонт қилишни әтиязлиқ мәҗбурийәтләрдин бири қилған. Хәвәрдә дейилгән “вәйран болған орманларни, қуруп кәткән дәряларни әслигә кәлтүрүш” дегән гәпләр, бу йәрдә әслидә бар болған тәбиий муһитниң еғир дәриҗидә бузғунчилиққа учриғанлиқини көрсәтмәктә.

Хитай һөкүмити йиллардин буян уйғур райониға ичкири хитайдин техиму көп аһалә көчүрүшни пиланлиған вә етибар сиясәтләрни қоллиниватқан болуп, буниң үчүн районниң су вә орман байлиқини толуқ контрол қилип, чоң көләмдики су амбарлирини қуруп, орман бина қилишқа киришкәнлики мәлум. Көчәт тикиш, уларни асраш вә пәрвиш қилиш үчүн йәрлик хәлқниң һашарға селиниватқанлиқи билинмәктә. Мәзкур хәвәрдиму, турпан тоқсундики 40 миң мо йәргә көчәт тикиш үчүнла 60 йеза кадири вә нурғун әмгәк күчиниң ишқа селинғанлиқи йезилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.