Uyghur rayonida “Derex tikip orman bina qilish” téximu köp xitay köchmenlirige muhit hazirlash herikiti bolup qalghan

Washin'gtondin muxbirimiz jewlan teyyarlidi
2024.03.15

Uyghur rayonidiki tebi'iy bayliqlarni köplep qézip, ékologiyelik muhitni éghir derijide buzghunchiliqqa uchratqan, ihate ormanni yoq qilip boz yer échip, qum köchüshni éghirlashturghan xitay da'iriliri emdi Uyghur rayonini téximu köp ahale yashaydighan makan'gha aylandurush üchün “Köchet tikip orman bina qilish” seperwerlikini bashlighan.

“Shinjang géziti” ning 15-mart küni chiqarghan xewirige qarighanda, 3-ayning 12-küni xitaydiki “Köchet tikip orman bina qilish” küni munasiwiti bilen turpan, xoten qatarliq jaylarda 500 ming mo köchet tikilgen. Buning üchün jaylardin nurghun adem küchi we yerlik kadirlar ishqa sélin'ghan.

Turpanda qurghaqchiliq, xotende bolsa qum köchüsh éghir jaylar bolup, xitay da'iriliri ashliq ishlepchiqirishqa kapaletlik qilish we yashash muhitini yaxshilash üchün bu wilayetlerdiki étizlarni ihate orman bilen qoghdash, derya-östenglerni rémont qilishni etiyazliq mejburiyetlerdin biri qilghan. Xewerde déyilgen “Weyran bolghan ormanlarni, qurup ketken deryalarni eslige keltürüsh” dégen gepler, bu yerde eslide bar bolghan tebi'iy muhitning éghir derijide buzghunchiliqqa uchrighanliqini körsetmekte.

Xitay hökümiti yillardin buyan Uyghur rayonigha ichkiri xitaydin téximu köp ahale köchürüshni pilanlighan we étibar siyasetlerni qolliniwatqan bolup, buning üchün rayonning su we orman bayliqini toluq kontrol qilip, chong kölemdiki su ambarlirini qurup, orman bina qilishqa kirishkenliki melum. Köchet tikish, ularni asrash we perwish qilish üchün yerlik xelqning hashargha séliniwatqanliqi bilinmekte. Mezkur xewerdimu, turpan toqsundiki 40 ming mo yerge köchet tikish üchünla 60 yéza kadiri we nurghun emgek küchining ishqa sélin'ghanliqi yézilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.