Uyghur aptonom rayonluq partkomning emeldari Uyghur rayonida “Jungxu'a milliti ortaq éngi” ni üzül-késil hel qilishni telep qildi

Washin'gtondin muxbirimiz erkin teyyarlidi
2023.09.25

Uyghur aptonom rayonluq partkom birliksep bölümining da'imiy mu'awin bashliqi su shyangdong 24-séntebir küni ürümchide chaqirilghan bir qétimliq muhakime yighinda söz qilip, rayonda “Jungxu'a milliti ortaq éngi” berpa qilishta “Siyasiy étirap qilish we xelqining köngüldin qobul qilishi mesilisini üzül-késil hel qilish” ni telep qilghan. Uning körsitishiche, “Jungxu'a milliti ortaq éngini berpa qilish partiyening yéngi dewrdiki milletler xizmiti we milletler nezeriyesi tetqiqatini chongqurlashturushning tüp asasi” iken. “Jungxu'a milliti ortaq éngi berpa qilishning nezeriye we emeliyiti” namliq bu yighinning, xitay hökümiti 2017-yili Uyghurlarni keng kölemlik tutqun qilip, lagér-türmilerge qamash, yene bir qisim Uyghurlarni “Yötkep ishqa orunlashturush” namida mejburiy ishchilargha aylandurush bilen bir waqitta, Uyghur rayonini ‍omumyüzlük xitaylashturushqa kirishkendin béri 2-qétim chaqirilishi bolup hésablinidu.

Bu qétimqi yighin xitay re'isi shi jinpingning ötken ayning axirliri jenubiy afriqadin qaytish sepiride ürümchide toxtap, yerlik da'irilerdin uning “Shinjangni bashqurush istratégiyesi” ni dawamliq qattiq ijra qilishi, “Shinjangda islamni xitaychilashturush” ni tézlitishi we “Jungxu'a milliti ortaq éngi” berpa qilishni téximu kücheytishni telep qilishining arqisidinla ötküzülgen. Uyghur aptonom rayonluq birliksep bölümi torining xewiridin melum bolushiche, yighinda su shyangdong: “Biz ortaqliqni kücheytish yüzlinishige qarap méngishimiz, jungxu'a milliti ortaq éngi berpa qilishta chongqur, ichike we emili tetqiqatlarni élip bérishimiz, ‛jungxu'a milliti ortaq éngi berpa qilish‚ xizmitining muhim emeliyiti we mol mezmunini toghra chüshinip we ching tutup, siyasiy étirap qilish we xelqning köngüldin qobul qilish mesilisini tüp yiltizidin üzül-késil hel qilishimiz kérek” dégen.

“Shinjang géziti” ning bildürüshiche, Uyghur aptonom rayonluq birliksep bölümi, Uyghur aptonom rayonluq diniy ishlar idarisi, shinjang pédagogika uniwérsitéti qatarliq orunlar uyushturghan bu yighin'gha Uyghur rayoni we xitay ölkiliridin 12 dek orun qatnashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.