Xitayning milletler ishliri aliy emeldari, az sanliq millet sen'etchilirining ortaq kimlikke merkezlishishini telep qilghan

Xitay döletlik milletler ishlirigha mes'ul aliy emeldari, az sanliq millet sen'etchilirining eserliride öz millitini gewdilendürüshini tenqidlep, ularning ijadiyette ortaq kimlikke merkezlishishini telep qilghan. Bu, xitayning “Jungxu'a milliti ortaq gewdisi éngi” berpa qilishta bashqa millet edebiyat-sen'etchilirining ijadiyette shu milletning turmush xasliqi we milliy en'enilirini téma qilishi we uni eks ettürüshigimu cheklime qoyghanliqning ipadisi, dep qaralmaqta.

“Jenubiy xitay etigenlik pochtisi” gézitining ashkarilishiche, xitay döletlik milletler ishliri komitétining re'isi pen yö xitayning 31-iyul küni ötküzülgen “Memliketlik 13-nöwetlik az sanliq milletler edebiy ijadiyiti tulpar mukapati” yighinida söz qilip, az sanliq millet sen'etkarlirining ijadiyette “Öz millitini merkez qilishi” ni tenqidligen. Uning körsitishiche, az sanliq milletler sen'etkarliri eserliride “Ortaq kimlikni merkez qilishi kérek” iken.

Pen yö buning aldida yeni bu yil 6-ayda, qeshqerde ötküzülgen “Shinjang tarixiy we kelgüsi” namliq xelq'ara yighindimu “Xitay medeniyitining barliq milletlerni birleshtürgüchi amil” ikenlikini ilgiri sürgenidi. “Jenubiy xitay etigenlik pochtisi” gézitining bildürüshiche, pen yö tibet tilida ishlen'gen bir filimni tenqidlep, bu filimning peqet rohiy dunyagha merkezleshkenliki, uningda kompartiyening töhpisige yéterlik salahiyet bermigenlikini bildürgen.

Pen yöning qeyt qilishiche, kéyinki yillarda az sanliq millet eserliride “Gherbning köp qutupluq medeniyet nezeriyesi” ning tesirige uchrashtek “Kishini endishige salidighan” yüzlinish körülmektiken. Xitayning bu yilliq “Az sanliq milletler edebiy ijadiyiti tulpar mukapati” bir Uyghur terjiman'gha bérilgen. Melum bolushiche, “Shinjang yazghuchilar jem'iyiti” ning mu'awin re'isi bolghan eysa yüsüp isimlik bu terjiman, turghun mijitning 2022-yili xitay merkizi teshwiqat bölümi teripidin xitay tilida neshr qilin'ghan “Wangsen kochisi” namliq aqsudiki xitaylarning hayati téma qilin'ghan kitabini Uyghurchigha terjime qilghaniken.