Шаир османҗан савут вапат болди

Мухбиримиз үмидвар
2013-10-20
Елхәт
Пикир
Share
Принт

Уйғур һазирқи заман шеирийитидики мәшһур вәкилләрниң бири османҗан савут 18 - өктәбир күни үрүмчидә вапат болди. Туюқсиз қозғалған кесәлдин вапат болған османҗан савут бу йил 68 яшқа киргән иди.

Османҗан савутниң вапати уйғур елиниң ичи - сирттики әдәбият мухлислириниң қайғусини қозғиған болуп, улар униң әдәбий иҗадийити вә аңлиқ һаятиға юқири баһа бәрди.

Чәтәлләрдә яшайдиған бир қисим уйғур зиялийлири османҗан савутниң вапатиға болған тәзийисини билдүрүш билән униң уйғур әдәбиятидики орниға юқири баһа бәрди.

Османҗан савут 1960 - 1990 - йиллар арисида өзиниң бир қатар лирик шеирлири билән яшларниң һөрмитигә еришкән иди.

Османҗан савут 1945 - йили манас наһийисидә туғулған. 1966 - Йили шинҗаң университетида, 1982 - йили лу шүн әдәбият институтида оқуған. У, 1961 - йилидин етибарән шеир иҗадийәт билән шуғуллинип, «алмидәк йүрәктә аләмчә сөйгү» қатарлиқ 6 шеирлар топлими нәшир қилдурған. Униң шеирлири уйғур оқурмәнлириниң яхши көрүшигә еришкән иди.

Османҗан савут талантлиқ шаир болупла қалмастин бәлки йәнә талантлиқ әдәбий тәрҗиман иди. У чәтәлләрниң нобел әдәбият мукапатиға еришкән роман вә повестлирини уйғур тилиға тәрҗимә қилған.

Униң сидиқ һаҗи рози әпәнди билән бирликтә тәрҗимә қилған илмий аммибаб тәрҗимә әсири «рәқибләр вә иттипақдашлар» уйғур китабханлириниң 1940 - йиллар тарихини чүшинишидә зор рол ойниған иди.

Османҗан савутниң вапатидин қайғурған уйғур миллий һәрикити рәһбири рабийә қадир османҗан савутниң уйғур миллити вә мәдәнийитини сөйгән вә униңға әқидә бағлиған зиялий икәнликини, униң йеқинқи йиллардин буян сиясий бесимларға дуч келип, роһи азапларға дучар болғанлиқини тәкитлиди.

Толуқ бәт