Xitaydiki öy-mülük baziri dawamliq chüshmektiken

Roytérs agéntliqining 31-öktebirdiki xewiride éytilishiche, xitaydiki öy-mülük baziri öktebir éyida dawamliq töwenligen. Xususiy shirketlerning bu heqtiki sanliq melumatliri bu halning 2021-yildin buyan izchil dawam qiliwatqan hadise ikenlikini janliq namayen qilip bergen.

Xewerde éytilishiche, xitay iqtisadining yüksilishidiki ghol tüwrük, dep qariliwatqan öy-mülük bazirining bu yosunda töwenlep méngishidiki eng muhim seweblerning biri, xitaydiki wirus yuqumini kontrol qilish tüpeylidin ijra qiliniwatqan bir qatar tedbirler bolghan. Amérika merkiziy istixbarat idarisining xadimi chén wénjing bu heqte söz qilip: “Wirusni nölge chüshürüsh siyasiti emeliyette xitayning öy-mülük bazirini öltüriwatqan eng muhim amil bolup qaldi” dégen.

Xewerde éytilishiche, sanliq melumatlar bu xil chékinishning xitaydiki 100 sheherde oxshimighan derijide mewjutluqini, bolupmu xitayning shangxey, gu'angju, shénjén qatarliq chong sheherliride téximu gewdilik ikenlikini körsetken. Buningda yéngi öylerning sétilishi we kona öylerning sétilishi oxshashla tesirge uchrighan bolup, öy sétish nishanining orunlinishi 50 pirsent etrapida bolghan.

“El jezire” ning bu heqtiki xewiride “Nawada xitay hökümitining hazirqi yuqum tedbirliri dawam qilsa, xitaydiki öy-mülük bazirining yéqin kelgüside eslige kélishidin ümid yoq” déyilgen.