Өзбек президенти америкидики өз алимлирини қайтип келишкә чақирди

Мухбиримиз үмидвар
2017-09-24
Share

Өзбекистан президенти шавкәт мирзийойеф америкидики өзбекистанлиқ мутәхәссисләрни өз вәтинигә қайтип хизмәт қилишқа дәвәт қилған. Бирләшкән дөләтләр тәшкилатиниң омуми йиғиниға қатнашқан өзбекистан президенти шавкәт мирзийойеф өткән һәптә америкада оқуватқан, яшаватқан вә оқуш пүттүрүп, бу дөләттә хизмәт қилип туруватқан өзбекистанлиқларниң вәкиллири билән учришиш өткүзүп, уларни өз вәтинигә қайтип хизмәт қилишқа чақирған.

“оттура асия хәвәрлири” ториниң бу һәқтики учурида ейтилишичә, мирзийойеф учришиш җәрянида өзбекистанлиқ алимларни өзи билән бирликтә ислаһат елип беришқа тәклип қилип, уларни америкидикигә охшаш өлчәм бойичә мааш, өй-туралғу, һәтта пүтүн йол чиқимлири билән тәминләйдиғанлиқини вәдә қилған.

Америкида яшайдиған бәзи өзбекистанлиқ мутәхәссисләрниң ейтишичә, ислам кәримоф өзбекистанни идарә қилған дәврдә америка вә башқа явропа әллиригә оқуш ишлири билән кәткән өзбекистанлиқлар арисида өз вәтинигә қайтмай, шу дөләтләрдә туруп қелиш көпәйгән болуп, улар бир тәрәптин қаттиқ сиясий тәқибләштин, йәнә бир тәрәптин у йәрдики еғир иқтисадий турмуштин әндишә қилған икән.

Униңдин башқа йәнә муһәммәд салих, җаһангир мәмәтоф вә башқа мәлум сандики өзбекистанлиқ өктичи затлар америка вә башқа әлләргә маканлишип, ислам кәримофниң һакиммутләқлиқ түзүмини әйибләшни давамлаштурған иди. Әмма һазирчә, шавкәт мирзийойефниң демократик ислаһат башлап, бу өктичиләрни вәтинигә қайтишқа тәклип қилған-қилмиғанлиқи намәлум. 

Өзбекистан оттура асиядики аһалиси әң көп җумһурийәт болсиму, бирақ ислам кәримоф дәвридә ишикни етивелиш сиясити йүргүзгәнлики үчүн иқтисадий җәһәттә өз қошниси қазақистанниң арқисида қалған. Қазақистанниң америкида оқушқа әвәткән оқуғучилири вә алимлири асаси җәһәттин өз дөлитигә қайтип ишләш вәзийити шәкилләндүрүлгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт