Özbék prézidénti amérikidiki öz alimlirini qaytip kélishke chaqirdi

Muxbirimiz ümidwar
2017-09-24
Share

Özbékistan prézidénti shawket mirziyoyéf amérikidiki özbékistanliq mutexessislerni öz wetinige qaytip xizmet qilishqa dewet qilghan. Birleshken döletler teshkilatining omumi yighinigha qatnashqan özbékistan prézidénti shawket mirziyoyéf ötken hepte amérikada oquwatqan, yashawatqan we oqush püttürüp, bu dölette xizmet qilip turuwatqan özbékistanliqlarning wekilliri bilen uchrishish ötküzüp, ularni öz wetinige qaytip xizmet qilishqa chaqirghan.

"Ottura asiya xewerliri" torining bu heqtiki uchurida éytilishiche, mirziyoyéf uchrishish jeryanida özbékistanliq alimlarni özi bilen birlikte islahat élip bérishqa teklip qilip, ularni amérikidikige oxshash ölchem boyiche ma'ash, öy-turalghu, hetta pütün yol chiqimliri bilen teminleydighanliqini wede qilghan.

Amérikida yashaydighan bezi özbékistanliq mutexessislerning éytishiche, islam kerimof özbékistanni idare qilghan dewrde amérika we bashqa yawropa ellirige oqush ishliri bilen ketken özbékistanliqlar arisida öz wetinige qaytmay, shu döletlerde turup qélish köpeygen bolup, ular bir tereptin qattiq siyasiy teqibleshtin, yene bir tereptin u yerdiki éghir iqtisadiy turmushtin endishe qilghan iken.

Uningdin bashqa yene muhemmed salix, jahan'gir memetof we bashqa melum sandiki özbékistanliq öktichi zatlar amérika we bashqa ellerge makanliship, islam kerimofning hakimmutleqliq tüzümini eyibleshni dawamlashturghan idi. Emma hazirche, shawket mirziyoyéfning démokratik islahat bashlap, bu öktichilerni wetinige qaytishqa teklip qilghan-qilmighanliqi namelum. 

Özbékistan ottura asiyadiki ahalisi eng köp jumhuriyet bolsimu, biraq islam kerimof dewride ishikni étiwélish siyasiti yürgüzgenliki üchün iqtisadiy jehette öz qoshnisi qazaqistanning arqisida qalghan. Qazaqistanning amérikida oqushqa ewetken oqughuchiliri we alimliri asasi jehettin öz dölitige qaytip ishlesh weziyiti shekillendürülgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet