Uyghur rayonida kadirlarning özini melum qilip mesile tapshurush dolquni qozghalghan

Muxbirimiz shöhret hoshur
2019-03-29
Élxet
Pikir
Share
Print

"Xitay xewer tori" da bügün xewer xewer qilinishiche, yéngisar nahiyesidiki bir doxturxana xadimi mesile tapshurushta ülge yaratqan.

Xewerde bu xadimning deslepte para élish we uni singdürüsh jeryanida qandaq psixik haletlerni bashtin kechürgenliki, intizam tekshürüsh tarmaqliri mesile tapshurush-özini melum qilish heqqide höjjet chüshürgendin kéyin bir chiqish yoli tapqandek bolup, nahayiti memnun bolghanliqi bayan qilin'ghan.

Xitay xewerliride ötken hepte ili wilayetlik partkom birliksep bölümining bir xadimining aktipliq bilen mesile tapshurghanliqi xewer qilin'ghan idi. Bu xewerler rayonda dölet kadirliri arisida mesile tapshurush dolqunining dawam qiliwatqanliqini ashkarilimaqta.

Muhajirettiki Uyghur közetküchiler xitayda memliket boyiche qozghalghan dolqun xaraktérlik heriketler gerche parixorluqqa yaki qara jem'iyetke qarshi qozghalghan teqdirdimu, emma Uyghur rayonigha kelgende buning siyasiy tüs alidighanliqi we yerlik xelqlerning hujum nishani bolidighanliqini ilgiri sürmekte.

Xitayning mesile tapshurush heqqidiki yuqiriqi ikki xewiride tilgha élin'ghan isimning bash boghumliridin mesile tapshurghuchining Uyghur ikenliki melum bolmaqta. Uyghur rayonida 2016‏-yilining ottura we axirliri yéza ahaliliri arisida mesile tapshurush dolquni qozghalghan bolup, ahaliler shu dolqunlarda özlirining 10 we 15 yil burunqi atalmish "Qanunsiz diniy pa'aliyetliri" heqqide melumat bérishke mejburlan'ghan idi. Mushu hepte radiyomizning éniqlashliri dawamida qaraqashning zawa yézisida bir jüp er-ayalning 10 yil burun bir diniy teblighge qatnashqanliqini melum qilghanliqi üchün 8 yilliqtin késilgenliki delillen'gen idi.

Nöwette Uyghur rayonida kadirlar arisida qozghalghan özini melum qilish dolqunining yene qanchilighan a'ililerge soruqchiliq élip kélidighanliqi közetküchilerning diqqitini tartmaqta.

Toluq bet