Pakistan metbu'atliri pakistanning “Shinjang erkin soda rayoni” din zor menpe'et alidighanliqini ilgiri sürmekte

Pakistan metbu'atliri pakistanning töwenlewatqan iqtisadini eslige keltürüsh we güllendürüsh üchün Uyghur diyarining pakistanni tépilmas pursetler  bilen teminleydighanliqini ilgiri sürgen.

 Pakistanda chiqidighan “Téz xewerler” gézitining 2024-yili 4-ayning 29-künidiki mexsus xewiride, xitayning yéqin ittipaqdishi bolghan pakistanning yéqinda xitay iqtisadini téximu köp xillashturush we kücheytish üchün Uyghur diyarida qurulghan erkin soda rayonidin ghayet zor menpe'et alidighanliqni ilgiri sürgen.

 Maqalida körsitilishiche, “Xitay-pakistan iqtisadi karidori” buningdiki muhim wasite bolup, bu arqiliq pakistan hökümiti kelgüside her yili 12 milyart amérika dolliriliq mulazimet heqqi yighalaydiken. Chünki bu yolni wasite qilghan halda “Shinjang erkin soda rayoni”gha meblegh sélish arqiliq xitay bazirigha, ottura asiya bazirigha we yawropa bazirigha ulashqili, bu arqiliq xitay bilen yéqin ittipaqdash bolghan halda pakistan iqtisadini zor derijide güllendürgili boldiken.

Pakistanning nacharlishiwatqan iqtisadini eslige keltürüsh üchün iqtisadiy purset izdewatqanliqi alahide tilgha élin'ghan bu maqalide Uyghur diyarining ene shu teriqide pakistanni nurghun iqtisadiy purset bilen teminlesh yoshurun küchi barliqi tepsiliy bayan qilin'ghan. Shunga , pakistanning “Shinjang”  emeldarliri bilen alaqini derhal bashlishi kéreklikini, “Xitay-pakistan iqtisadi karidori” ning buningdiki muhim munber ikenliki,  shundaqla buning her ikki döletke paydiliq munasiwet qurulmisi bolidighanliqini ilgiri sürgen. Bu hal xitay bilen pakistan otturisidiki “Heseldinmu shérin, himalaya téghidinmu büyük” dep teswirlinidighan yéqinliqning yéqin kelgüside téximu ashidighanliqidin bésharet, dep qariliwatqanliqi melum.