Pakistandiki partlitish weqeside üch xitay oqutquchi öldi

26-Aprél küni pakistanliq bir ayal karachi shehiridiki karachi uniwérsitétida bedinige téngiwalghan bombini partlitip üch xitay oqutquchi we bir pakistanliqning ölüshige seweb bolghan.

Roytérs agéntliqining bu heqtiki xewiride éytilishiche, bu üch xitay oqutquchi bashqa kishiler bilen birlikte chüshlük tamaqtin kéyin aptobusta mektepke qaytiwatqanda uniwérsitéttiki “Kungzi instituti” ning derwazisi aldida bomba partlighan we shu yerde ölgen.

Bu qétimqi “Adem bomba” hujumidin kéyin baluchistan azadliq armiyesi dep atalghan teshkilat özlirining bu qétimliq hujum weqesige mes'ul ikenlikini jakarlighan. Shuningdek saqchilargha “Adem bomba” bolghan ayalning ikki balisi bilen chüshken ilgiriki süritini ewetip bergen. Karachi saqchi idarisining bashliqi ghulam nebi bu heqte söz qilip “Ölgenler xitay iken. Bombiliq ayal belkim ashu uniwérsitétning oqughuchisi bolushi mumkin” dégen. Shuningdek bu xitaylarning “Kungzi instituti” da xitay tilidin ders bériwatqan oqutquchilar ikenlikini éytqan.

Melum bolushiche, 2021-yilidiki bomba hujumida pakistanda su ambiri yasawatqan 13 xitay inzhénéri ölgen iken. Xitaylarni nishan qilghan bu xildiki hujumlar pakistanda köp qétim körülgen bolup, xitay-pakistan iqtisadiy karidori qurulushigha narazi bolup kéliwatqan baluchistan qoralliqliri herqachan mushundaq hujumlargha mes'ul ikenlikini éytip kelmekte iken. Baluchistan ölkisining ehwali chong jehettin Uyghurlarning ehwaligha oxshap kétidighan bolup, baluchistanliqlar pakistan hökümitining öz zéminini bésiwalghanliqini, emma shunche keng zémin'gha ige baluchistan puqralirining pakistanda ikkinchi derijilik puqra ornida kemsitilip kelgenlikini, shundaqla baluchistan zéminining iqtisadiy jehettin talan-taraj qilinip kelgenlikini tekitlep kelmektiken.

Xitay-pakistan iqtisadiy karidori qurulushining köp qismi baluchistan tewesidin ötidighan bolup, bu qétimqi adem bomba hujumi yéngidin textke chiqqan shehbaz sherif üchün bir yéngi xiris, dep qaralmaqta iken.